عاوز اشوف ارائكم لو انا غلط
أنا شغال في مطبعة وشركة دعاية وإعلان فيها كذا شريك، ووالدي واحد منهم.
هو قالي إنه هيديني نسبة من نسبته في المكان عشان أحس إن المكان مكاني وليا فيه مستقبل، وأنا مقدر ده فعلًا.
بس المشكلة إن نظام الشغل نفسه مريحنيش.
المواعيد كانت من 12 لـ8 وبقت من 12 لـ9، ومع الوقت بقى الطبيعي إن لو في شغل بعد المعاد نكمل لحد ما يخلص. غير إن الإدارة مش منظمة، ومفيش توزيع واضح للمسؤوليات أو ناس كفاية تساعد، فحاسس إن الضغط كله متشال بشكل عشوائي.
أنا عندي خبرة فعلية في المجال وبفكر أبدأ حاجة خاصة بيا، حتى لو صغيرة في الأول، بس في نفس الوقت خايف أخاطر وأسيب شغل ثابت ومش عارف الخطوة دي صح ولا تهور.
الموضوع مش فلوس بس، أنا حاسس إني مش مرتاح نفسيًا في المكان ومش شايف نظام واضح أقدر أكمل عليه سنين.
عاوز آراء ناس مرت بحاجة شبه كده:
هل أكمل وأستحمل عشان الاستقرار؟
ولا أبدأ أخطط تدريجيًا لحاجة خاصة بيا حتى لو الموضوع فيه مخاطر