u/Just_City_8652

يا جماعة احتاج آراء الناس اللي فاهمة بالعقار والاستثمار

أنا نقلت الرياض من ٤ سنوات، ومن وقتها وأنا أدفع إيجار تقريبًا بين ٧٠-٧٥ ألف بالسنة. مؤخرًا بدأت أفكر بشكل جدي إني أشتري عقار بدل ما أكمل أدفع إيجار كل سنة، لكن مو عارفة وش الخيار الأذكى فعلًا.

أنا جدًا يهمني الموقع ونوعية الحي، والمناطق اللي أحبها وأسكن فيها حاليًا أسعار الشقق فيها تقريبًا بين ١.٤ إلى ١.٩ مليون، وهذا الرقم بصراحة أحسه عالي على شقة.

فصرت محتارة:
هل الأفضل أشتري شقة وأسكن فيها بحيث يكون المبلغ اللي أدفعه يروح لقسط بدل إيجار؟
أو الأفضل أشتري شيء أرخص بمكان ثاني وأأجره كاستثمار، وأنا أكمل إيجار بالمكان اللي أبيه؟

خصوصًا إن الخيار الثاني معناه إني غالبًا بدفع إيجار + قسط بنفس الوقت، فما أدري إذا فعلًا يعتبر قرار ذكي أو لا.

وبرضو أحسني مو قادرة أحدد:
هل شراء شقة غالية بموقع ممتاز يعتبر منطقي لأن العقار بالرياض قاعد يرتفع؟
أو الناس تبالغ حاليًا بالأسعار، والأفضل أبدأ بشيء استثماري أبسط؟

ودي أسمع من ناس عندها تجربة فعلية بالرياض

يا جماعة احتاج آراءكم

هذا الويكند رحت معرض عبايات، وانصدمت فعلًا من الأسعار. تقريبًا أغلب العبايات كانت تبدأ من ١٠٠٠ ريال وفوق، والقطع اللي فعلًا حلوة كانت ١٥٠٠ وأكثر، وهذا بصراحة أحسه مبالغ فيه جدًا.

يعني أنا الحمدلله أقدر أشتري، والصدق إني قد دفعت هالأسعار قبل، فالموضوع مو موضوع مقدرة، بس أحس فعلًا مو مستاهلة هالسعر أبد 😭 خصوصًا إن التصاميم مو شيء مبتكر أو مختلف بشكل كبير، أغلبها نفس ستايل الحرير الياباني مع تطريز خفيف وألوان هادئة وستايل منتشر جدًا بالإنستقرام وتشوفينه بكل مكان.

وبرضو حتى لو كانت الخامة ممتازة والشغل مرتب، أحس العبايات بسرعة تملين منها 😭 يعني بعد فترة قصيرة تزهقين من اللون أو الستايل أو تحسينه خلاص مو نفس جوك، فصعب أقتنع أدفع ١٥٠٠+ على شيء غالبًا بطفش منه بعد كم شهر.

بنفس الوقت المشكلة إن عبايات المولات كثير منها أحسها قديمة أو خاماتها مو مرة حلوة. أحيانًا تلقين شيء حلو، بس غالبًا مو نفس جودة أو ستايل العبايات اللي نشوفها عند البراندات بالإنستقرام. وأنا أحب العبايات الناعمة بهالستايل، خامات مرتبة، تطريز مرتب، وألوان هادئة.

فودي أعرف رأيكم بصراحة:
هل تشوفون طبيعي فعلًا تنباع العبايات بهالأسعار؟ وهل فعلًا تستاهل؟ ولا الموضوع صار مبالغة والبراندات قاعدة تبالغ بالأسعار بشكل مو منطقي؟

وبرضو إذا عندكم بدائل أفضل، مثل:
- خياطين شاطرين يسوون تطريز وشغل مرتب
- أماكن تبيع أقمشة وخامات ممتازة
- أو حتى براندات أسعارها معقولة مقارنة بالجودة

ياليت تشاركوني لأن أحس ضايعة بين إني أبي شيء مرتب وجودته حلوة، وبين إني مو مقتنعة أدفع هالمبالغ

يا جماعة احتاج رأيكم 😭

في واحد بالشغل صار لي تقريبًا سنة معجبة فيه، وحاسه في بيننا قبول مو بس من طرفي. مو إننا نسولف كثير أو بيننا تعامل مباشر مره، بس فيه نظرات، سوالف خفيفة، واحس واضح ان كل واحد منتبه للثاني. وحتى هو بالفترة الأخيرة صار يسلم ويسولف سوالف بسيطة وكذا.

المشكلة اني عمري ما دخلت بعلاقة ولا حتى تكلمت مع واحد بهالطريقة، فمو عارفة وش المفروض أسوي. وبرضو أنا مو موظفة معهم بشكل مباشر، أشتغل معهم عن طريق جهة ثانية، بس مهتمين يوظفوني عندهم بشكل دائم، فالوضع شوي حساس.

واللي مخوفني أكثر إن حتى لو فيه إعجاب واضح، أنا فعليًا ما أعرفه كشخص ولا أعرف إذا إحنا متوافقين أصلًا، ولا حتى إذا عوايلنا ممكن يكون بينهم توافق. وإحنا الاثنين بنهاية العشرينات، يعني مو بعمر الواحد يدخل شيء بس عشان تجربة أو تضييع وقت.

وأخاف لو الموضوع تطور رسمي بسرعة وبعدها اكتشفنا إننا مو مناسبين لبعض يصير الوضع محرج جدًا خصوصًا إننا بنفس بيئة العمل.

بنفس الوقت أحس يمكن المفروض الواحد يتعرف بشكل بسيط ومحترم قبل أي خطوة رسمية عشان يعرف إذا فيه توافق فعلًا، لكن حتى هالفكرة مو مرتاحة لها بالكامل 😭 بس بنفس الوقت أحس وش الحل الثاني؟ لأن أخاف ندخل بشي رسمي بسرعة وبعدين نخربها أو نحط نفسنا بإحراج.

وبرضو أنا أصلًا مو عارفة كيف ممكن أوصل له إشارة اني مهتمه بشكل محترم وواضح بدون ما أتجاوز حدودي أو أحط نفسي بموقف بايخ