تحسون انو مجتمعنا متصالح مع العابرات/العابرين/دراگ كوينز أكثر من المثليين؟
اني من زمان لاحظت انو المجتمع الشرقي أو على الأقل الدائرة اللي اني بيها ما عندهم اي مشكلة بشكل عام مع ذكور يلبسون و يتصرفون مثل الاناث و بالعكس . اهلي و أقاربي ناس مهتمين بالفن إلى حد ما و خصوصا السينما و يحبون السينما المصرية، اكو مقتطفات من افلام عديدة بيها شخصيات دراگ و اكو أفلام اصلا الشخصية الأساسية بيها دراگ و عادي كلش، يتابعون الفيلم حاله حال فيلم عادي. و هاي شغلة من الطفولة جنت استغرب منها.
فقبل كم يوم جنا كاعدين اني و اهلي و بيت عمتي، نتابع احد افلام محمد هنيدي بعنوان يا انا يا خالتي، و ما كدرت اقاوم الفضول جنت اريد اعرف شنو رأيهم بأمثال شخصية هنيدي... الكل جان مركز بالفيلم مع انو هاي مو اول مرة يشوفونها، سألت 'شعجب المصريين ما حجبوا هل فيلم؟ هذا مو حرام' و ماتوقعت احد يجاوبني لأن الكل عيونه ع الشاشة و يكرز. المهم عمتي حاوبت كالت "خطية هذوله، اكو مو بيدهم"، و أبوية وافقها الرأي، ما كال شي بس ايماءة.
اليوم جنا كاعدين دنباوع على مس ريتشل على يوتوب، فيديوهاتها بيها كومة ناس متعاونين وياها يغنون و يركصون و كذا، فريق يعني. واحد من أعضاء الفريق شخص اسمه جولز هوفمان، غير ثنائي. اني ما اتابع مس ريتشل فاتعجبت مو بس بوجود شخص مثل جولز، لا جان عبالي انو بس هي اللي تطلع بفيديوهاتها. المهم فتت للصالة شفت جولز دتغني ويا ريتشل، كلت "عبالي بس هي تطلع بالفيديوهات، منو هذاك؟" وحدة من عماتي كالت "هذا جولز" و طبعا عمتي اعتقد جانت تتوقع مني حجي سلبي عن جولز، انو مثلا اعيب لو اضحك لو استنقص، فقبل لا احجي هي قاطعتني كالت 'هي لا بنية و لا هي ولد، كلش عجيب. بس حباب و مو مثل بعض المتحولين الي كل شغلهم أنو يتعرن كدام الناس و يتصرفون بشكل'
يعني عادي يمهم طالما الملابس مو كلش مكشوفة و كذا، هذا اللي استنتجته. انتو شتكولون، هل فعلا مجتمعنا متصالح وياهم؟ هم صادفكم أشخاص متصالحين ويا مجتمع ميم إلى حد ما بس بشروط؟