u/Manipulation1337

السلام عليكم جميعا
دايم اشوف في الكومنتات ناس فاهمين بالحياة ولهم خبرة بامور كثيرة واتمنى اسمع وجهة نظرهم في السالفة اللي بقولها

عمري ٢٧ وانا اكبر واحد باخواني و اخواتي
امي و ابوي واخواني كلهم الله يحفظهم لي لطيفين بشكل مو طبيعي ، كلهم متعلمين وناجحين بحياتهم الحمدلله لكن المشاعر عندهم ١٠ اضعاف اللي عندي ، ابسط مثال ممكن اقوله عشان توصلكم الفكرة
انهم لطيفين ومايقدرو يقولو للناس كلمة لا ولو حتى على حساب راحتهم و وقتهم وماعندهم اي فكرة كيف ياخذو حقهم اذا تعرض احد منهم لظلم

لما كان عمري ٢١ سنة فهمت الوضع وحاولت اكون لسانهم اللي يسولفو فيه ودايم انصحهم واحل كل مشاكلهم ، ف صار الكل يستشيرني لاني ابجح منهم وصرت اواجه الناس عنهم

خلال السنين هذي من ٢١ الين ٢٧ كنت حرفيا شايل المشاكل اللي في البيت كلها من ابسط مشكلة زي اختي تهاوشت مع صديقتها لين مشكلة مثل تقسيم ورث جدي بين ابوي و اخوانه واتاكد انه اخذ حقه كامل

طبعا في المقابل انا كنت مهما الحياة تلعن جدفي وتاخذني شرق وغرب ما افتح فمي لاحد منهم عشان ما اخليهم يشيلون هم ولاني اعرف ماحد منهم يقدر يسوي شي ، لدرجة دخلت عملية وطلعت من دون علم احد فيهم ،

كان عندي كبت كلام جدا في امور كثير لكن كنت اسكت خوف عليهم
والنتيجة من كل هذا اني صرت عديم مشاعر ، لا احس بمشاعر الفرح، الخوف ، الحزن ، الشفقة، الحب، الحياة صارت ابيض و اسود مالها طعم ، انا حرفيا عديم مشاعر ، لوهلة حسيت ان قلبي اسود
وجريت احجز موعد عند ثيربست ، خلاصة كلامه ان وضعي جدا سيئ واحتاج علاج سلوكي باني اعبر اكثر واتامل اكثر و كورس مضادات اكتئاب لان وضعي صعب ، طبعا كلامه وعرض الحائط ، خرجت من عنده وسويت عمره ودعيت الله يرجع لي لو واحد في المية من مشاعري

الوضع جدا سيئ ، الانسان بدون مشاعر كانه ميت
انا حاس اني عبارة عن جسد بس ، حاس اني عديم انسانية

I will appreciate any suggestions or advice