معلومة اليوم راح تكون عن احد اكثر الكائنات المميزه الي عاشت عالارض و الي هيه الافاعي

×××××××××××××××××××××××××××××××××

الافاعي ترجع اصولها قبل 150 مليون سنه بدت و تطورت من نوع من السحالي الي عدها ارجل بس بمرور الزمن و حسب تكيفاتها و احتياجاتها بدت تنضمر اطرافها لحد ما اختفت بشكل كامل

الحيه معروف عن جسمها و هيكلها و فكرها مرنين كلش تساعدها على ابتلاع الفرائس لان ما عدها اسنان تمضغ بيها ف تعتمد على جهازها الهضمي بهضم الفريسه

ما عدها جفون ولا اذان بس تستشعر الذبذبات الارضيه و تگدر هم تستخدم لسانها حته تكشف الروائح الموجوده

×××××××××××××××××××××××××××××××××

شنو هيه انواع الافاعي؟

العربيدات : افاعي سمها قوي جدا و انيابها ثابته و سمها عصبي يعني يستهدف جهازك العصبي و يسببلك مشاكل بالتنفس و استجابة الاعصاب ، مثل الكوبرا و المامبا السوداء

الافاعي الحقيقيه (viperidae) : افاعي انيابها طويله تنطوي للداخل و تطلع من تريد تعض الكائن عكس العربيدات ، سمها دموي يسوي تجلط بالدم و يخثره ، من انواعها افعى الجرص الي تعيش بالصجراء و تهز بذيلها حته تطلع صوت خرخشه

العاصرات : هاي الافاعي مو زامه تعتمد على عضلات جسمها حته تعصر الفريسه و تبلعها عضلاتها كلش قويه و احجامها چبيره مثل افعى البايثون و الاناكوندا

الاحناش : افاعي صغيره مقارنه بالباقيات تشكل تقريبا 50% من الافاعي بالعالم اغلبها غير سامه و السام منها ماله ضرر عالبشر لان سمها خفيف جدا ، تعيش عالاشجار و بالبيوت او المزارع من انواعها افعى ال(boomslang)

الافاعي العمياء : افاعي صغيره جدااا تشبه دودة الارض تحفر بالگاع و تاكل بيوض النمل

×××××××××××××××××××××××××××××××××

شنو اكبر افعى عاشت عالارض؟

اكبر ثعبان مكتشف عالارض هو تيتانوبوا سيريجونينسيس (Titanoboa cerrejonensis)

و اكيد هيه منقرضه حاليا عاشت قبل 60 مليون سنه بالغابات الاستوائيه الحاره بامريكا الجنوبيه حاليا

طولها يوصل لحد 14 متر و وزنها يوصل اكثر من طن !!!

عرض جسمها يوصل لحد متر كامل!!!!

چانت تعيش قرب الانهار و المستنقعات و تتغذى على الاسماك الچبيره و ما چانت سامه

×××××××××××××××××××××××××××××××××

حطيت صور لانواع الافاعي بنفس الترتيب مال البوست يعني الصوره الثانيه بيها كوبرا و الصوره الاخيرا التيتانوبوا

هاي معلومة اليوم ال12 و شكرا هلو هلو يلا باي 🌷

تصميمي ☝️

شايف من بطل اللعبه يهايط على اقوه بوس باللعبه و يگله لو بيك خير انزلي و انت الي تتورط لان راح تعصه يمه 5 ساعات ؟💔💔

اليوم الموضوع راح يكون عن كائن خلد الماء و الي هون احد اغرب الكائنات على وجه الارض

غريب لدرجة انو العلماء البرطانيين بال1799 من وصلهم هذا الكائن و چان محنط عبالهم مقلب و واحد مخيط منقار بطه على قندس !!

×××××××××××××××××××××××××××××××××

ليش يعتبر من اغرب الكائنات ؟

يبيض : هوه يعتبر ثديات يعني يرضع اطفاله و بنفس الوقت يبيض ، كل الثديات بالعالم تولد ما تبيض بس هذا الكائن يبيض

الحليب : ما يفرز حليبه مثل الثديات و لازم الطفل يرضعه لا ، الحليب يطلع من غدد من بطنها بطريقه تشبه التعرق و الاطفال يلعقون الحليب من شعرها

هوه كائن برمائي بس من ينزل بالمي ما يشوف يغمض عيونه و يسد خشمه و يغطس بالمي و اعتماده الاساسي بصيد الفريسه هيه جاسته السادسه الي تساعده على الاحساس بالموجات الكهرومغناطيسيه مثل القرش و هواي كائنات مائيه ثانيه

عنده منقار يشبه البطه و فايدته تكون موجوده بي مستشعرات الطاقه الكهرومغناطيسيه

الذكور عدهم سم يفرذو من اضافر ارجلهم الخلفيه يعني اذا يريد يسممك لازم يدفرك

ما عنده معده : حرفيا المريئ متصل بالامعاء مباشره ماكو معده و ما يگدر يفرز احماض هضميه

و يتهوج بالاشعه فوق البنفسجيه بلون بين الازرق و الاخضر بطريقه تخلي يشبه parry the platypus الي هوه شخصيه كارتونيه مبنيه على هذا الكائن

×××××××××××××××××××××××××××××××××

قبل 166 مليون سنه ببداية تكون الثديات انقسمت الشجره و طلعت منها سلاله نادره جدا و هي اجداد خلد الماء و چانوا يعيشون بقاره عملاقه چانت تضم استراليا و امريكا الجنوبيه و القاره القطبيه الجنوبيه

بس هوه حاليا منقرض من كل مكان و متواجد بس باستراليا بعد ما تفككت القارات و بسبب العوامل البيئيه الثانيه

×××××××××××××××××××××××××××××××××

هاي چانت معلومة اليوم ال11 و التفاعل نازل عالسلسله شكلها الناس ملت منها 💔💔

حطوا ابفوت اذا اول مره تسمعون عنه 💗🌷

بما انو اليوم هوه اليوم العاشر و استمريت حته ويه الباند الي اكلته راح نتكلم اليوم عن 3 كائنات مو كائن واحد

الي يميزهم انو هذول الكائنات عاشوا لملايين السنين بدون اي تغيير بجسمهم

×××××××××××××××××××××××××××××××××

النوتيلوس (Nautilus)

موجود عالارض صارله 500 مليون سنه !!! يعني موجود عالارض قبل الديناصورات و الاشجار !!!

هوه يعتبر ببداية شجرة الاخطبوطات چان عدهم اصداف بعدين تطوروا و تخلوا عن صدفاتهم هوه الوحيد الي بقه محافض عليها ، نجي من 5 انقراضات جماعيه و بقه عايش لحد يومنه هذا

صدفته بيها 40 غرفه يكدر ينضم بيهن السوائل و الغازات حته يصعد و ينزل

عكس الحبار و الاخطبوط الي عدهم 10 و 8 اذرع هذا عنده 80 ذراع !!! فايدتهم يحس بيهم لان نضره ضعيف و يلزم بيهم اكله

يتحرك عن طريق عضو يشفط المي و يدفعه

يعيش على عمق 700 متر بالمحيط الهادي و الهندي حجم البالغ منه يوصل لحد 25 سانتيم

×××××××××××××××××××××××××××××××××

سرطان حذوة الحصان (Horseshoe crab)

غايش عالارض صارله 450 مليون سنه تقريبا

اسمه سرطان بس هوه ما ينتمي للسرطانات هوه يعتبر من مفصليات الارجل يعني هوه اقرب للعقرب و العنكبوت من السرطان لكن يعيش بالمي

دمه ازرق لان يستخدم النحاس بنقل الاوكسجين بدل الحديد و عنده خلايا مناعيه قويه جدا بحيث اذا دخلت اي بكتيريا سامه علي راح يتخثر دمه مباشره

و هذا الشي ساعد العلماء جدا بصناعة الادويه للبشر لان ياخذون جزء من دمه و يجربون علي الادويه و يشوفوا يتخثر لو لا اذا تخثر يعني سام و اذا ما تخثر يعني مو سام

جسمه من فوگ مدرع و عنده ذيل صلب مدبب وضيفته مو للتهديد وضيفته الوحيده يقلب جسمه اذا انقلب على ضهره و يساعده عالحركه

عنده 10 عيون 2 منها بارزات تخلي يشوف الاشعه فوق البنفسجيه (البشر ما يشوفوهن)

عندي 6 ازواج من الارجل و حجمه يوصل لحد 60 سانتيم يعيش بالشواطئ و المياه الساحليه الضحله يعني مكشوف للبشر ما يعيش بالاعماق

×××××××××××××××××××××××××××××××××

سمچة السيلكانث (Coelacanth)

المفاجأة بهاي السمچه انو العلماء متاكدين انو هيه منقرضه ويه الديناصورات لاسباب عديده و لگولها احافير ترجع لحد 66 مليون سنه

بس العجيب انو لگوها تسبح بشكل طبيعي بالمي سنة 1938 و چانت مطابقه بشكل تام للاحافير الي لگوها

طولها يوصل مترين و وزنها لحد 80 كيلو

الشي المميز كلش بيها انو عدها 8 زعانف و 4 منهن حرفيا بيهن عضام و عضلات و مفاصل !!! هذى الشي عجيب كلش و هذا دليل على تطور بعض انواع السمك من مائيه الى برمائيه و حته حركتها بالمي بهذني الزعانف ال4 يشبه حركة الكائنات البريه

ما عدها عامود فقري عدها بداله انبوب مرن مليان بالزيت من الداخل

تگدر تستشعر الموجات الكهرومغناطيسيه مثل القرش حته تصيد الفريسه

تعيش بالكهوف المائيه على عمق 500 متر و عمرها يوصل لحد 100 سنه!! و العجيب اكثر انو مدة الحمل مالتها 5 سنوات كامله و هذا شي عجيب الصراحه

×××××××××××××××××××××××××××××××××

هاي چانت معلومة اليوم العاشر للاسف حسابي الرأيسي تبند لمدة 3 ايام و راح اكمل انشر بهالحساب لحد ما يرجع حسابي

و راح ارجع انشر هاي المعلومه مره ثانيه بحسابي بس مو بالصب حنشرها بحسابي حته ما تصير هوسه و تبقه السلسله مرتبه بذاك الحساب

حطوا ابفوت اذا عجبتكم معلومة اليوم و علمود تواسوني لان حسابي تبند خطيه اني 🙏😭

اكو عجايز عدهم مراهقه متأخره ما نلعبهم 🙏😭💔