سوداني يبحث عن عمل
ما ساهل على زول يكتب الكلام دا… لكن وصلت مرحلة ما عندي خيار غير إني أتكلم. مع انو عارف المنصة ما مكانها لكن م خليت مكان
أنا شاب سوداني محاسب عندي في السودان خبرة سنتين اسي قاعد في السعودية وما خليت باب ما دقيتو وما خليت منصة من لينكد ان وقروبات واتساب للوظائف ومتعهدين بالقروش وايميلات كل يوم وبرسل للشركات الcv بتاعي وما بلقى رد ، جاي أحاول أبدأ حياة جديدة بالحلال، لكن قاعد فترة طويلة بفتش على شغل وما لقيت. كل يوم بمرّ أصعب من القبلو، والضغط النفسي قبل المادي بقى تقيل شديد.
الإحساس إنك عايز تشتغل، قادر تشتغل، لكن ما لاقي فرصة…مع الوساطة وعدم المهنية دا إحساس موجع. خاصة لما تكون وراك مسؤوليات وأهل معتمدين عليك.
أنا ما بكتب الكلام دا عشان استعطاف فارغ، ولا عشان شفقة… أنا بس محتاج فرصة. أي شغل شريف أقدر أبدأ بيهو من جديد، أثبت نفسي وأقوم على رجولي.
لو في زول هنا عندو نصيحة، أو يعرف فرصة، أو حتى كلمة ممكن تساعد… أكون شاكر ليكم شديد.
ربنا يهون على كل زول ضاقت بيهو.