WE قاطعين النت عني بقالهم أيام — ورابع مرة تحصل كفر الدوار، محافظة البحيرة.
أنا بجد وصلت لمرحلة مش عارف المفروض أعمل إيه أكتر من كده.
النت مقطوع بقاله كذا يوم. مش أول مرة، ولا تاني مرة. دي تقريبًا رابع مرة يحصل معايا نفس السيناريو: الخدمة تقطع بالأيام، أتصل بخدمة العملاء، محدش يرد، ولو حد رد مفيش معلومة مفيدة ولا موعد واضح لرجوع الخدمة.
والأسوأ إن الموضوع مش جديد عليا. كلمت NTRA مرات كتير قبل كده، وقدمت شكاوى كتير، ومشيت في كل الطرق الرسمية اللي المفروض العميل يلجأ لها. وبرضه مفيش حاجة بتتغير.
يعني إحنا بندفع الاشتراك كامل وفي معاده، لكن لما الخدمة تختفي بالأيام، محدش بيحاسب، محدش بيرد، ومحدش حتى بيكلف نفسه يشرح للعميل إيه اللي بيحصل.
أنا دافع فلوس مقابل خدمة. لما الخدمة تبقى مقطوعة بالأيام، أنا بدفع مقابل إيه بالظبط؟
ومش هكتب بوست وأسأل "حد عنده النت قاطع؟" لأن ده مش أصل المشكلة. حتى لو العطل عندي أنا لوحدي، ده مش بيدي الشركة الحق إنها تسيبني بالأيام من غير خدمة ومن غير رد.
ومش محتاج حد يقولي:
"كلم خدمة العملاء" — كلمتهم.
"اشتكي NTRA" — اشتكيت، ومرات كتير.
"استنى شوية وهترجع" — استنيت، ودي مش أول مرة.
أنا عايز أعرف إيه آخر خطوة فعلية ممكن تتاخد ضد شركة بتقطع عنك الخدمة بالأيام، وبتاخد فلوسك كاملة، ومفيش أي وسيلة فعالة تخليك توصل لمسؤول؟
لأن بصراحة أنا كرهت WE بكل ما تحمله الكلمة من معنى. مش بسبب عطل حصل مرة، لكن بسبب سنين من نفس التعامل: العميل يدفع، الشركة تقطع، والعميل هو اللي يفضل يجري وراهم عشان ياخد الخدمة اللي هو أصلًا دافع تمنها.
إحنا مش بنطلب صدقة. إحنا بندفع مقابل خدمة. ولما الخدمة مش موجودة، من حقنا نسأل: فلوسنا راحت فين؟