إنجاز صغير وكريديتس لنفسي
بعد سنة ونص من أخر أجازة أخدتها الحمدلله النهارده أقدر أنام وانا مرتاح لمدة ومش نص يوم زي كل مرة
من شهر تلاتة الي فات وانا داخل رابعة كلية بدأت رحلة مشروع التخرج وبدأت اجمع تيم وبما اني في كلية عملية --حاسبات-- كان لازم اعمل حاجه فعلا ليها وزن مش اي بروجيكت وخلاص
وكالعادة الدنيا حطيتني ليدر للتيم معرفش ليه مصممة كل مره تحطني في نفس المكان وكان لازم اتحمل مسؤولية كل حاجه وبدأت التفكير في أفكار وأتناقش مع التيم وأسيرش وأقسم يمين شمال والناس الي معايا ترجعلي بأسوأ نتايج ممكنة وأنا أصلح وأحاول تاني
لحد ما بدأنا الشغل الفعلي وكل حاجه بانت وفهمت اني هشيل ضغط كل حاجه لوحدي وتعدي الشهور والاقي نفسي بخبط دماغي الحيط كل يوم من كتر الضغط وقلة النوم شهور كاملة بنام اربع وخمس ساعات بسبب اني ملتزم بشغل ومشروع تخرج وكلية
عشان في نفس الوقت الاقي فرصة كنت عمال اخبط على بابها بقالي سنة ونص لوحدي لحد ما قررت الدنيا تديني فرصة مقدرتش أرفضها وأتقبلت في منحة لغة مكثفة أربع أيام في الاسبوع كنت بذاكرها لوحدي بقالي سنة ونص
وبقا معايا منحة وكلية ومشروع تخرج وشغل بين الحين والأخر
حسيت ان المرحلة ديه عدت كل مراحل الضغط الي عديت بيها طول ال 21 سنة الي عديتهم اكني فتحت ليفل جديد من تحمل الضغط
لحد ما وصلت للبيك المنحة وإمتحانات تخليني يا أكمل يا أتكل على الله ومعايا تيم بتحايل عليه عشان يشتغل لدرجة اني بقيت الترم التاني مقسمش حاجه وقولت الي عايز يتابع معايا حاجه يبعتلي من أول الترم وكالعادة محدش بعت حاجه ولقيت نفسي شغال على بروجيكت عملاق داخل فيه 4 5 مجالات
في لحظات كتير كنت فعلا خلاص مش قادر لا نفسيا ولا جسديا مش قادر أكمل ومن كتر التفكير مش قادر أعيش ولا عايز بكرة يجي ولكن سبحان من أداني الصبر والطاقة اني أكمل
في نفس الوقت دخل حاجه رابعة على الخط وهي مسابقة بتتعمل للطلبة وكان لازم أشارك فيها بأي شكل لانها اخر فرصة ليا ومحتاجه وقت ومجهود جبار
مهما حاولت كان دايما لازم حاجه من الأربعة تقع لدرجة ان في يوم كان عندي إمتحان على ليفل كامل وتاني يوم هي المناقشة حرفيا
والحمدلله المناقشة خلصت وعدت على خير مكانش همي اني اتناقش من مين ولا اتصور ازاي كان كل همي اني اطلع شغل انا فعلا فخور بيه واتعلمت منه كتير جدا جدا يعني
ووصلت لأخر تلات أسابيع قبل التخرج وأصعبهم تلات أسابيع حرفيا يوميا من العصر لحد 2 او 3 بليل عشان كل حاجه تتقفل وكل حاجه تشتغل زي ما كنت عايزها تشتغل -- وبشكر اخويا وحبيبي سعيد الي كان معايا للأخر الوحيد الي ممكن اكون اعتمدت عليه في حاجه وانا متطمن-- واتخرجت الحمدلله وكتبت للتيم الرسالة التمام على كل الهم الي شيلهولي والضغط الي حطوني فيه بسبب إهمالهم وقرفهم
ودخلت فترة المسابقة كان لازم أذاكر كتير وأحل كتير وتوبيكس بتاخد أيام ومسائل بتاخد ساعات وتدريب بحضره كل أسبوع كل ده مع المنحة وقعدت شهرين من بعد ما اتخرجت لحد ما وصلت للمسابقة في شهر 8 وانا بزحف على الحال ده ومع تراكم كل ده كنت فعلا باخد بالمعنى الحرفي من روحي عشان أدي كل حاجه حواليا خلصت طاقتي وطاقة جسمي وصحتي ودخلت على روحي أخد منها
والحمدلله خلصت المسابقة وانا في مستوى راضي عنه نوعا ما وطلعلي إمتحان ليفل تاني في المنحة ولسه مخلصه النهارده
من شهر 1 2025 وأنا بحاول بكل ما املك اني أعمل حاجات أبقا فخور بيها وسبب اني كتبت كل ده هو اني لسه عندي شك اني معملتش كفايه فبثبت لنفسي انا مريت بايه ووصلت لفين وازاي
بشكر نفسي على اني طلعت عايش بعد كل ده