وين بتروحوا بغضبكم؟
أنا ملحدة من ٨ سنين تقريبا. وين ما بلف وجهي بلاقي سبب جديد للغضب من الظلم. التفكير الي خرب حياة الناس والظلم الي شفته وعشته وقرأت عنه وأثر علي وعلى ناس بحبهم، والهجوم الي بلاقيه إذا بفتح تمي بحرف حتى لو بدون إهانة شخصية لحدا.
ليش غضبي ما بينشاف على إنه ردة فعل طبيعية لظلم كبير؟ ليش دايما لازم نحن كأشخاص متأثرين بشكل مباشر من أفكار معينة خربت حياتنا لازم نقعد ندادي ونغنج بعض المسلمين ونشرحلهم بحب واحترام ليش نحن بشر وليش حقنا نعيش وحقنا نحكي ونرفض الظلم لما هم مرات أفكارهم بتحرضهم يولعوا فينا ويلغوا وجودنا؟ ليش غضبي يعامل على إنه غير مشروع؟ أنا مش ضد النقاش وفي كتير مسلمين بحياتي محترمين وبحبهم وعندي استعداد أحكي مع الناس باحترام لأني مش متوحشة بطبيعتي. بس ليش حتى مش قادرة أحكي بشكل واضح للناس إنه أنا شفت ظلم شنيع ومحتاجة أحكي عنه ومحتاجة الناس تسمعني؟ ليش لازم أخاف أعبر عن رأيي وأخبيه من الناس وأعمل حالي متقبلة الوضع الي نحن فيه؟
ليش الإلحاد شي بيتخبى من الأصل؟
يا أخي حتى لو بدك تشوف ثيرابيست بتقعد تفكر يا ترى هل رح يتقبلني هل بقدر أكون صريحة معه ولا رح يقلي انقلعي اقلبي وجهك؟
ليش ما إلي حق أحكي وأعبر وأحلم بالتغيير؟ ليش أنا بنكتم وما بحكي عن معتقداتي لما المسلمين عندهم حرية يعبروا عن معتقداتهم بإنهم مثلا يحطوا آيات قرآنية على سياراتهم وأبواب المحلات وجوا البيوت وبالبايو وبوست طالع بوست نازل ووين ما بروح أو أي نقاش طبيعي بيدخل فيه شي إسلامي؟ أنا مع إنه الكل يعبر عن رأيه بغض النظر عن معتقداته، بس ليش أنا والي زيي ما بنقدر؟ ليش ما حدا بده يسمعنا لما نحن مضطرين نسمع ونشوف ونعيش واقع غير مناسب النا؟ وين أروح بغضبي لما حياة كتير ناس ضاعت ما رح يرجعها الاحترام والنقاش الحضاري؟ انتم وين بتحطوا غضبكم؟