نقاش على الجيل الحالي
السلام عليكم، نقاش وموضوع حاب أفهم وجهة نظر الناس فيه، وأرجو إن الردود تكون بكل احترام وادب
لاحظت بالفترة هذي، وخلال جم سنة الي فاتت، إن تركيز البنات والشباب تغيّر بشكل واضح.
بالنسبة للبنات، ألاحظ إن الفلوس والمستوى المادي صاروا أولوية عند البعض. حتى قريت مرة وحدة تقول: «الدين والخلق ما راح يوكلني عيش». وصار موضوع الزواج عند البعض كأنه تجارة أو فرصة لتحسين مستوى المعيشة على افى الزوج او الزوجه
مثلاً:
أهلها دخلوها حكومة، تقول: انا أبي عيالي يدخلون خاص
أهلها ما يسفرونها، تقول: أنا أبي ألف العالم كله
أمها تساعد أبوها وتوقف معاه، واهي تقول لك: أنا ما أساعد زوجي بشي اهو مسؤول على كل شي عبالها انه بنك متحرك
يعني أشياء هي ما كانت تسويها ببيت أهلها، تتوقع إنها تكون حق مكتسب لها ببيت زوجها
وبنفس الوقت، أشوف بعض الشباب كل تركيزهم على الشكل والجسم، لدرجة ما يفكر يسأل: شنو أخلاقها؟ شنو شخصيتها؟ شنو معدنها؟ وهل فعلاً تصلح تكون شريكة حياة؟
فالمشكلة وين بالضبط؟ هل تغيرت معايير الزواج عند الجيل الحالي؟ وهل السوشال ميديا والمظاهر والمقارنات لها دور بهالشي؟
وهل للحين في ناس واعية تشوف الزواج شراكة ومودة ورحمة، مو مجرد فلوس وشكل ومظاهر؟
أتمنى أسمع آرائكم ، وبكل احترام للجميع.