تجربتي في المنافسه عالميا
حفاظاً على خصوصيتي ما بذكر اسم الرياضة او جنسيتي
فكرت اكتب هذا البوست بعد مشاهدتي لكأس العالم لكره القدم والسبب التشابه الكبير بيننا، والله مره مره مره افهم مبابي ورغبته في الفوز بكأس العالم او الاداء المجنون اللي قدمه الرأس الاخضر وايش العزيمه ذي اللي عندهم
عموما بتكلم عن قصتي شخصيا هي قصه طويله شوي لو مو مهتم اسحب
اهتميت بالرياضه من طفولتي، يمكن ما كنت اتنافس فيها عالميا(اصلا ما كنت اعرف عن المسابقه العالميه) لكن بشكل او بآخر كنت دائما اتعلم واشارك في مجالات قريبه منها مثلا وعمري 11 جبت الاول على دولتي في احد المنافسات الكبيره جدا (الفئه العمريه حول عمري) اللي خلينا نقول هي في مجال له علاقه قويه برياضتي.
في فترة ما في حياتي قررت ادخل لهذي الرياضه وكنت مهتم جدا بالمشاركة عالميا. في دولتي عشان تشارك عالميا تحتاج تشارك في مجموعة من التصفيات تقام طوال السنه ثم بعدها يؤهلون الافضل للمشاركة العالمية، لكن عشان تشارك في التصفيات نفسها(مستحيل يقبلون الكل) تحتاج تثبت كفائتك وخبرتك وهنا دولتي ايضا مسويه برنامج(يشبه نظام انمي بلو لوك لو تعرفونه) تصير خلاله تصفيات كثيره وعلى مدار سنوات عشان يخلون الشخص مؤهل للدخول للتصفيات نفسها والمشاركة عالميا، لو كنت كفؤ في الرياضه يمديك تسكب ذا كله وعلى طول تشارك لكنها صعبه جدا وفعلا بتحتاج كل سنين التدريب هذي.
على العموم بسبب نظام التصفيات هذا غالبا كل شخص رح يشارك في سنه او اثنين طوال مسيرته ونادرا تحصل شخص يشارك ثلاث سنين، ثم خلاص معد يمديك تشارك اكثر من كذا لان فيه عمر معين او حاله معينه لو وصلتها ما تقدر تشارك
في حالتي دخلت البرنامج هذا وفي اول تصفيه صارت كنت المركز الاول، لكن من بعدها حصلت تذبذبات لكن على العموم قدر اصمل واوصل للتصفيات وشاركت وقدرت اني اشارك في سنتين في مختلف المسابقات العالمية ثم قبل سنه وصلت لهذا العمر وخلاص ما اقدر اشارك مره ثانيه
عاده القصص اللي تذكر تكون جميله، البطل يفوز يحصل على العز والفخر ويثبت كلامه ووعوده ويحقق الانتصارات والإنجازات. انا كنت الnpc في قصه البطل، على الرغم من ان رياضتي تخليني بشكل او باخر افضل من اغلب البشر الا اني ما اهتم لكيان البشر انا ابغا افوز وانا ما قدرت افوز، ابغا ارجع وانافس لكن خلاص ما اقدر، انا ما حققت المجد انا ما فزت وبالعكس انا فشلت في تحقيق الانجاز
ابغا افوز لكن المنافسة انتهت، المنافسه كانت كل شيء في حياتي والان وبعد سنه لا زالت مؤثره عليها، صح ان حياتي ما راحت عبث وفعلا انا مستفيد من كل ذا في الجامعه الان وكل شيء سويته مسهل حياتي الجامعية مره لكن انا لا زلت رح اشوف حياتي عبث والسبب اني ما فزت، محد رح يفهم شعوري الا شخص خسر من قبل، اقدر افهم مبابي وشعوره لما خسر ضد الأرجنتين في كاس العالم صح هو نجح وحقق شيء من قبل لكن لا زال هو ما فاز وقتها، انا بكيت في كل مره خسرت فيها رغم اني نادرا ما ابكي، انا ما خسرت مثل مبابي او الرأس الاخضر كشخص صمد بل كانت هزيمه لا تذكر.
في النهاية انا مجبر اكمل اعيش هذي الحياه والحياه رح تمشي وانا متعلق بماضي، لا زالت رغبتي بالفوز كبيره لكن السباق انتهى من زمان