u/_amro

أول مرة في حياتي احس الإحساس دا، فجأة من غير أي مقدمات اكتشفت اني مش راضي عن حياتي، استوعبت من العدم ان بقالي فترة طويلة جدا عايش من غير اي ادراك مع اللي بيحصل حواليا، واني مجرد ماشي مع الموجه وخلاص.

المشكلة الاكبر إن النهارده لمجرد اني صحيت متضايق قررت اغير حياتي، ولو اني مستغرب ازاي القرار دا يطلع من وقت المفروض انا مخنوق فيه وكل اللي عايزه اني اريح دماغي.

لقيتني بعيد عن حلم البراند بتاعي، عن اللغة اللي بتعلمها، عن جسمي اللي ببنيه، عن الشتايم اللي كنت مبطلها، عن السجاير اللي بطلتها كتير ورجعتلها وانا مش واخد بالي، عن كتبي اللي هجرتها.

عن نفسي اللي بخاف متكونش النفس اللي عاوز اكون عليها.

من النهارده مفيش حكومه، أنا الحكومه.

اكتشفت ان كل شروق شمس بيعدي عليا انا بكون ابعد عن الشخص اللي انا عاوز اكون عليه، وعشان كدا

انا قررت انه هيكون اخر شروق شمس هيطلع عليا وانا بعيد عن حقيقتي.

يمكن تكون دي السيجارة العشرين اللي اشتريها واقول ان دي اخر سيجارة هشربها.

اتعلمت من الدنيا ان كل حاجة بتصغر اما بنبص عليها من فوق وان مفيش صعب طالما انت من جواك عاوزه.

المره دي مختلفة، ويمكن برضو دي المره العشرين اللي اقول عليها مختلفة، لكن المره دي انا سردت الاسباب اللي انا مؤمن بيها تمنعني ابطل.

استنوني كل يوم من سلسلتي الحبيبة وعن قصتي وحياتي المثيرة للاعجاب.

وانت حُر ما لم تضُر وما لم تتعدى حدود الله.