Rant: Ich hasse Sport und ich hasses, das ich Sport hasse.
Sali zäme,
Das isch mee bitz en sinnlose Rant für mich eifach mal zums irgendwo usegla ha und au eifach nur es Erscht-Weltproblem. Und viellicht het ja als positive Näbeeffekt öper vo eu ja irgend e Idee.
Ich weiss ich muen Sport mache. Ich bin imene Alter, wo Bewegig immer wichtiger wird. Ich bin nöd dick oder so aber bitz Speck het agsetzt und wott au nümme so eifach weg wie früener. De Ablick im Spiegel wird langsam unschön.
Ich han i mim Lebe viel Sport und Bewegig usprobiert. Kung Fu. Boxe. Judo. Fuessball mit de Kollege. Mehreri Aläuf im Gym. Home-Gym. Jogge. Wandere. Eifach nur go spaziere.
Es klickt eifach nüt. Ich weiss, es tuet mer guet. Ich merk relativ schnell Fortschritt. Aber eimal usgla oder e Wuche id Ferie oder en Tag Regewetter, isch grad wieder verbii mitem Sport. Ich weiss, dass dezue viel, viel Disziplin ghört. Aber es chan doch nöd sii, dases so en Chrampf isch. Dass min Körper nach Bewegig schreit aber mis Hirn nur degege akämpft.
Was sicher eis vo mine Problem debii isch, isch au, dass d Ussicht uf en gsunde Körper als Motivation nöd langed und ich au nöd gwillt bin, viel Geld defür uszgä (Gym-Abo, Club-Mitgliedschaft), well schlussendlich isches sowieso nur usegschmissnigs Geld. Ich bruch irgendwie e zuesärtlichi Motivation wie "Ich lern Selbstverteidigung debii" oder "ich han jetzt öpis Produktivs mit dere Astrengig gmacht". Bi letschterem isch mer mal d Idee cho, körperlich astrengendi Freiwilligearbet zleischte.
Dezue chunnt no, dass s Schaffe im Moment sehr viel Ziit und mentali Chraft nimmt. Laht sich im Moment nöd gross ändere und ich bruch de Job. Gsund isch das au nöd, das isch mer bewusst. Drum viellicht au chli de Drang nachemne Usgliich.
So, Rant verbii. Viellicht hend ihr ja e Idee wie ich de riesigi inneri Sauhund überwinde chan. Und wenn nöd, danke trotzdem fürs Lese!