محتاجه مساعده بجد محدش يطنش والنبي
انا دفعة 2027 علمي رياضه وحاسه اني اتسرعت ف الاختيار شويه فمحتاجه رأيكم
1️⃣ انا معنديش شغف بالكليات الطبيه ولا بحب الاحياء نهائيا مع اني مخدتش احياء قبل كده ف ثانوي ولكن كان عندنا كام درس ف اعدادي فاكره انهم كرهوني ف عيشتي كلها واسمهم كانوا مجرد قشور للماده مش احياء فعليا
2️⃣ ف نفس الوقت انا مكنتش بحب الرياضه طول عمري بدأت احبها مؤخرا من اول تالته اعدادي وبقيت بستمتع وانا بذاكرها عشان بحل ع الدروس من غير ما اضطر احفظ كوم كلام لإني مش بحب الحفظ (((لكن شاطره فيه)))
3️⃣ مش بحس نفسي ذكيه enough اني ادخل علمي رياضه عشان اي مسائل مش مباشره بتضيعني خالص ومش بعرف افكر فيها ودايما ببقى محتاجه حد يوريني طرف الخيط
4️⃣ لو قارنت من ناحية الدرجات ف انا كده كده على مدار دراستي كنت شاطره جدا مكنتش بنقص ولا درجه ف اي ماده وف تالته اعدادي كنت جايبه 280/280 الحمد لله ف هتكلم عن درجاتي من اول ما دخلت ثانوي لإن الي قبل كده مش مقياس
اولى ثانوي : 57/60 ـ تانيه ثانوي : 46/60
الفرق اني ف اولى كنت باخد سنتر وتانيه كنت باخد اونلاين مش قلة مذاكره مني لإني ف تانيه يعتبر ذاكرت اكتر من اولى بس راكمت شويه والمنهج كان اصعب وفيه تريكات اكتر وانا زي ما قولت مش بعرف خالص اتعامل مع التريكات وبتوقعني جدا انا فاكره الامتحانات جت صعبه ومكنش فيه غير تلت اربع اسئله ف كل امتحان الي متأكده منهم والباقي بالحظ لمجرد ان كان فيه مسائل مش مباشره كتير
5️⃣ اهلي وخاصةً امي كانوا عايزين يشوفوني دكتوره وماما بتقولي كلام يقطع القلب وان ده كان حلمها واتخسف وان ازاي انا معنديش طموح يتقالي يادكتوره وان هي كانت فاكره ان ده حلمنا احنا الاتنين وانا الوحيده ف اخواتي الي متأسسه صح وييجي مني اني اجيب مجموع عالي وادخل طب
6️⃣ الفرق بين علوم ورياضه ماده واحده ف ساعات بحس مش مشكله لو ضغطت على نفسي شويه وذاكرت احياء بدل رياضه وكده كده مفيش حاجه اسهل من حاجه واهو اكون بعدت عن المسائل والتفكير العالي وف نفس الوقت احاول احقق حلم اهلي لإن احنا معندناش اي مقدره احول امريكان او ادخل جامعه خاصه المجموع الي هجيبه هدخل بيه اي كليه حكومي تتفتحلي
7️⃣ الكليات الطبيه برستيج فقط معظمها ملهاش شغل حاليا ما عدا طب بيسافروا برا ولكن I'm not ready yet اني ادرس خمس سنين وسنتين تدريب وعشرين سنة عقبال ما اكون شاطره ف شغلي وتجيلي فرص اسافر برا
8️⃣ انا بدور ع الحاجه الي عليها الطلب ف سوق العمل والي هتجيبلي فلوس اسرع وسمعت ان التفكير ده غلط والمفروض ادرس الحاجه الي بحبها بس انا مش حاسه اني بحب الهندسه أو ان دماغي عاليه اوي لدرجة اني ادرس software و Ai و programing مع اني اتمنى والله اكون شاطره فالحاجات دي ولكن زي ما قولت انا مش حاسه اني ذكيه enough
9️⃣ صحابي كلهم علمي علوم او ادبي مش هلاقي حد يساعدني ويوجهني واسأله على اي حاجه هعطل فيها
🔟 انا عايشه ف اسيوط معندناش مدرسين اعتمد عليهم واثق فيهم والي موجودين مواعيدهم وحشه اوي والسنتر الي هما فيه مش مريح نهائيا والجو هناك صعب اوي والامتحانات والواجب بيكونوا صعبين زياده عن اللزوم ومفيش تسامح انا جربت قبل كده وسبت المستر عشان كنت بحسه بيشرح بسرعه أو محتاج حد ذكي ودماغه عاليه عشان يفهمه ويركز معاه طول الحصه وكان نفسي آخد مع مستر احمد عصام وف نفس الوقت مش مستعده اخد اونلاين خالص فالرياضه بالذات حتى لو مش هراكم