أسئلة راودتني بعد سنه في هذا الصب
اتوقع اني بكمل سنه هنا، وخلال هالفتره كثرت تساؤلاتي عن بعض الرجال الموجودين في الصب، خصوصا اللي تواصلوا معي بعد البوست اللي نزلته
اول شي لاحظته هو موضوع المسؤوليه،،، جزء كبير منهم يا انه ما تعود يتحمل مسؤوليه فعليه، او داخل الزواج وهو من البدايه يفكر كيف يقسمها، شخص قرب الثلاثين، موظف من سنوات، لكنه ما زال عايش عند اهله، ما يدفع ايجار ولا اكل، وحتى سيارته غالبا ابوه شاريها له ما عنده مدخرات، استثمارات، ما جمع ولا عنده خطه للمستقبل! انا من الثانوي وانا اشتغل على نفسي عشان اجيب درجات عاليه وادخل تخصص ممتاز تعبت لين تخرجت الاولى على دفعتي بالجامعه ، انتقلت للرياض، وعشت مع روميت، وكنت استاجر سياره الى ان جمعت واشتريت سيارتي, بعدها اشتريت شقه وصار يدخل لي منها دخل، وما زلت اعيش مع روميت واتقاسم المصاريف، واغلب فلوسي يا مستثمرتها او مدخرتها, وانا الطرف اللي "مو مفروض" عليه يدفع مهر او زواج او يجهز بيت، لذلك طبيعي انصدم لما يجيني شخص اكبر مني بسنوات، لكنه مو متاكد اصلا هل معه مبلغ الزواج، او ما سبق له تحمل اي مسؤوليه حقيقيه في حياته
التساؤل الثاني عن التواصل والتصرفات الطفوليه، طبيعي جدا تكتشف انك مو مناسب لشخص لاي سبب، لكن مو طبيعي بعد شهور من التواصل ودخول الاهل وان الموضوع صار شبه رسمي، تختفي فجاه وما عاد ترد، واضطر انا اكون الشخص الاكبر والاعقل وانهي الموضوع عن الطرفين لانك ما قدرت تتكلم اوحتى ترسل رساله, حتى جمله بسيطه مثل "ما احس اننا مناسبين لبعض، الله يوفقك" صارت صعبه؟ ما فيه حتى الحد الادنى من الاحترام والوضوح في التواصل القوستنق هو الطريقه المفضله عند الاغلب :) , اتمنى فعلا ان الواقع افضل من التجارب اللي شفتها هنا، لاني بدات احس اني اتواصل مع اطفال، واحيانا افكر ان الشخص اللي ادور عليه شخصيته ما تخليه يشوف ريديت بل ياخذ زمام الامور ويدور بالطريقه التقليديه اوعلى ارض الواقع
فضفضه بعد مجموعه تجارب غير موفقه، والله يوفق الجميع