u/c_3i

زمان الشخص مكنش بيقارن نفسه تقريبا إلا بالناس اللي حواليه، دلوقتي أي حد يفتح إنستا أو تيك توك يشوف آلاف الناس الأجمل والألطف والأغنى والبصل والكوسة.

هل دا بيخلي الناس تدخل علاقات وهي عقلها متبرمج على احتمالات وحاجات تانية هو راسمها في دماغو بناء على حياة الناس اللي بيشوفها عالسوشيال "اللي بيظهر منها جزء صغير بس ومنعرفش عن حياتهم حاجه."

وهل دا ممكن يدي إحساس إن فيه أحسن من الحد اللي اخترته سواء شب أو بنت ويحسسه بعدم الرضا؟ وهل دا ممكن يكون سبب لفشل علاقات؟

ولا الحاجات دي مش بتفرق بالدرجة دي؟

لو أنت كـ شب راتبك كويس وقادر إنك تصرف على البيت في الحاجات الأساسية والرفاهيات، هل هتكون حابب إن زوجتك تكون بتشتغل وممكن يكون مكان العمل مختلط وبتتعامل مع رجالة أو عندها زمايل رجالة في الشغل؟ أو حتى لو هي حاطة حدود في تعاملاتها مع الأجانب عنها، هتكون فكرة أنها بشتغل عادي بالنسبالك ولا لأ؟ مع إنك مش محتاج فلوسها وأصلا انت اللي بتصرف،

وهل لو هتتقدم لبنت وهي شغالة وأنت رافض فكرة أن شريكتك تكون بتشتغل ممكن تقولها اقعدي مش الشغل وأنا هكفيكي؟ ولو رفضت هيكون رد فعلك ايه؟ ولا لو أنت رافض فكرة إن شريكتك تكون بتشتغل مش هتروح أصلا لبنت بتشتغل وتقولها اقعدي؟

حوار المواقف المحرجة دا مضحك اوي

مرة في فرح عند الجيران وأخو العروسة أعرفو، روحت اسلم عليه. بدل أما اقولو ألف مبروك عقبالك، قولتلو كل سنة وأنت طيب 😂

وموقف كمان، كان أبويا تعبان شوية فـ كان جاي ناس زمايلو يزوروه فـ أنا كنت بستقبلهم، واحد منهم بيقولي السلام عليكم قولتلو الحمد لله 😂

والموقف بيعدي يعني والحاجات دي بتحصل معايا باستمرار ولما افتكر بضحك على نفسي

أنا من سنتين تلاتة كان لما يطلعلي فيديو لبنت بترقص أو متبرجة عموما كنت بقفل عيني وأسكيب علطول، وحتى وأنا ماشي في الشارع كنت ببص في الأرض ومببصش على البنات غير النظرة الأولى وخلاص. ده كان في أولى وتانية ثانوي تقريبًا.

لما دخلت تالتة، كان فيه واحد زميلي بس سلام سلام كدا مش صحوبية، اتصاحبت عليه اوي في تالتة وكان أوقات كتير بيوصلني ونتمشى بعد الدروس، وكان يقعد يوريني بنات ويقولي دي اسمها كذا ودي في سنة كذا. في الأول مكنتش متأثر أوي، بس مع الوقت لقيت نفسي اتعودت أبص، وبقيت بسأله لما اشوف بنت أقوله دي مين وعندها كم سنة وكدا، وبقا عادي عندي أشوف حاجات على السوشيال كانت زمان بالنسبالي ممنوعة.

دلوقتي عيني بقت تروح على البنات عادي والخجل اللي كان عندي قل كتير، بس لا بكلم حد ولا بعاكس، مجرد نظرات بس، بس طبيعي مع النظرات دي في بنات هتعجبني وأبقت عاوز اتعرف عليهم بس بتحكم في نفسي ومش بعمل أي حاجه لأن دا مش طبعي وعمري مكونت كدا

والحمد لله تالتة خلصت على خير هو تقريبًا صاحبي الوحيد دلوقتي، بس حاسس إني بقيت نسخة سيئة من نفسي، ولما بفتكر أنا كنت عامل إزاي من سنتين وأشوف نفسي دلوقتي بزعل، معرفش الوقف دا كان لابد منه ولا لأ