التعلق بدون حب!
معنديش مكان اكتب فيه تاني فهكتب هنا يمكن حد يساعدني
مش عارف ابدأ الكلام ازاي بس اختصارا معايا بنت في الشغل الأول مكانش فيه كلام بينا وبعدين واحدة واحدة بدأنا نقرب من بعض ونتكلم كأصدقاء في الأول ومع الوقت اكتشفت ان البنت دي هي فيها كل حاجه بتمناها من البنت اللي عايز اتجوزها إلا حاجه واحده بس (وللأسف أهم حاجه) وهي ان شكلها not my type
المهم فضلنا نقرب لبعض ونتكلم لحد ما اكتشفت من حد تاني ان هي عندها مشاعر ناحيتي
الكلام ده عدى حواليه سنتين مثلا وانا عايشهم كلهم في عذاب، اتعلقت بيها جدًا وكل ما افكر ابعد تجيلي أفكار اني هندم ندم عمري اني ضيعت حد بالصفات المثالية دي وطول الوقت عمال افكر فيها ومش عارف اطلعها من دماغي
طبعا انا مقولتلهاش اي حاجه لاني مستحيل أضحك على حد واقول لحد اني بحبه وانا مش متأكد ومؤخرًا بعدنا شوية وبطلنا نتكلم
بس انا مش عارف فعلا ايه الحل؟ لا عارف ابعد ولا عارف اقرب وحاسس اني علطول متحاصر