Boomer Eltere ond Fake News - Rant
I gsehne mini Eltere ned allzu oft weli im Usland wohne, aber jedes mol weni dihei verbii gange, freue mi mega mini Eltere ond au Fründe zgseh. Ond am Afang goht meischtens au alles guet. Ond irgendwenn kippets denn eifach gliich wieder ond es falled then halt so kausalisierendi Ussage öber Usländer, die z'Bern wo eh nüd mache, neui AKW's wos unbedingt bruucht etc. Aber mer seit denn stolz, mer folgi ned am Parteiblatt vo de SVP ond me döfi jo wohl no säge was mer denkt.
I weiss ehrlech gseit nömm wiiter. Mini Eltere läsed ke Tagesziitig meh, nome no 20min ond de Blick, mis Mami het gseit sie luegi au ab ond zue Blocher TV ond sösch Regionalsänder. För d'Halbierigsinitative hättes auf fasch gstomme besi denn gseit ha, das segs denn aber au mit em Skirönne gsi.
Sie gheiet ine uf jede rage bait ond sie läbed au es bez enere boomer bubble. Zum Biespel min Götti liest schiinbar d'Weltwoche ond esch zemli am abdrifte. Ond i cha wie nüd mache. Sie wiiched au ned vo irne Meinige ab ond es esch emmer alles so negativ ond schlecht. Debii gohts ned gar ned schlecht. Klassisch boomer händs es Eifamiliehuus, Auto, Ferie etc. Ond anstatt das Pension wörde gniesse rege sie sech öber di usländische Nochbere uf obwohl die selber au scho so bünzlig send.
I meine, was macht mer doh? I ha s'Gfüehl i be mängisch eifach au en dankbare Abnähmer wenn sie weder mol müend ere Fruscht loswerde. Gseh wotte sie notürlech gliich no, send jo mini Eltere ond sie send sösch au wörklech netti Lüüt, aber i ha eifach es bez Angscht dass endgöltig abdrifte. Es esch au so vell missgonscht ome gegenüber allem und jedem ond all wo ned konform send, send eh suspekt. Plus au no judging ohni Endi: "Lueg mol wie dick dass de esch, muess de so vill ässe" bis zu, "wieso het jetzt die grüeni Hoor?".
Es esch eifach alles ongfiltered ond negativ. Es cha ned eifach mol öppis schön oder guet sii, es esch emmer: jojo, es esch schön gsi...aber. Ond de gönds die ganz Ziit es nöche Usland aber flueched öber die Dütsche i de Schwiiz. Aber wie geil vill ond billig dass mer dete cha go ässe, ond wie tüür das alles isch i de Schwiiz. Aber sich de gliichzitig weder ufrege dass all Läde dicht möched bi eus.
Ond notürlech stimmeds Jo för d'Nochhaltigkeitsinitiative zum dene "in Bern" en Denkzettel zverpasse.
I ha eifach s'Gfüehl i dringe nöme dore bi ine ond sie händ sich au scho gwonderet wieso dass sich die einte vo irne Fründe eifach nömme melde. Us ihrer Sicht gits ke Grond, aber es send ebe ned all dere Meinig.
Bzw...früehner woni no Chind gsi be sinds so mitti links gsi.