تعبت من التفكير
السلام عليكم
اخباركم عساكم بخير وصحه وعافيه ان شاءالله.
انا رجل عمري 22 سعودي من الشرقيه مواليد الحسا بس سكنت طول عمري بالدمام، اهلي من المذهب الشيعي وانا من المذهب السني ولوجود هذا التصادم العقائدي للاسف الاهل مابيني وبينهم اي تواصل الا قليل. حاولت ولازلت ابر ب امي و ابوي واوصل الرحم ولكن الى الان مافيه اي تجاوب من جهتهم.
انا موظف بشركة ارامكو السعوديه اشتغل بمنطقه نائيه قريب الخفجي ومن سنتين وانا عايش مستقل وخذيت لي شقه بالخبر بحكم الاستقرار بدل من سكن الشركه.
قبل سنه تواصلت معي اختي وهي الوحيده اللي بقت تتواصل معي من اهلي واقترحت لي موضوع الزواج وقالت لي ان صديقتها هم ناويه عالزواج وانا تحمست وللامانه على قد ما اني ما امانع اعيش لحالي لكن وجود شريك بيضيف شي بحياتي.
المشكله الكبيره اللي واجهتني انها قبيليه ومن قبيلة معروفه بتشددها نوعا ما، ولا اخفيكم ان مرات تجيني الضيقه ان اللي صاير لي مو ذنبي ولا انت اللي اخترت اهلي وان شي انا ما اتحكم فيه يحدد مصير مستقبلي يعطيني شعور غريب (غلقه).
تواصلت مع اخوها وشرحت له وضعي واني جاي بالحلال وابي القرب وتفهم وضعي وقال لي بساعدك باللي اقدر عليه لكن البلا ابوي لاتستغربه يسئلك عن احفاده بعدين يسئلون عمامهم وين، من قالها وانا ما ادري وش اسوي، ابجيب معي مشايخ اعرفهم وابجيب معي اخوياي للخطبه بس ان الاحتمالات تقبل كل شي وهذا اللي خلاني اسلم امري لرب العالمين.
*تنويه مهم:- اللي كتبته ماهو بقصور او إساءة الى اي طائفة كانت حنا ببلد واحد وشعب واحب ومايفرق بيننا شي ان شاءالله.
داري طولت عليكم وحاب اعتذر ان كان خذيت من وقتكم على سالفة ماتسوى. شكرا لكم