u/msagf

بس حابه أفهم شيء واحد فقط لا غير

ليش اللي بنحبه من كل قلبنا ممكن يطلع عادي جدًا يبعد أو يترك وكأنه ما صار شي؟

أنا مش فاهمة كيف بصير هيك. كيف أنا ممكن أكون شايلة شخص براسي طول الوقت و أفكر فيه، أربط أي تفصيلة فيه بأي شعور عندي، وهو بنفس الوقت عايش حياته بشكل طبيعي كأن وجودي أو غيابي نفس الشي

أكتر شي مقرف إنه احنا ما بنحب نص نص. لما بنحب، بنحب زيادة عن اللزوم أحيانًا. بنعطي اهتمام، وقت، تفكير، وتعلّق. بنحط الشخص بمكان أكبر من حجمه الحقيقي، وبنبلّش نعتبره جزء أساسي من يومنا بدون ما نلاحظ

وبنفس الوقت هو ممكن ما يكون شايف كل هالشي. ممكن يكون موجود بس بحدود. يعطي لما بده، يختفي لما بده، يرجع لما بده، بدون ما يحس إنه في طرف ثاني متأثر زيادة عن اللزوم

واحنا بنضل نحاول نلاقي تفسير. نحاول نفهم ليش صار هيك، ليش برد، ليش بعد، ليش قرب. وبنقعد ندور على أي لحظة حلوة صارت ونكبرها ونمسك فيها كأنها دليل إنه لسه في أمل

بس الحقيقة اللي بنخاف نعترف فيها إنه يمكن إحنا كنا داخلين الموضوع بعمق، وهو ما كان داخل بنفس العمق من الأساس

مش لأنه سيء، ولا لأنه عم يتعمد يوجعنا. بس لأنه ببساطة مش شايف نفس الشي اللي إحنا شايفينه

والأصعب إنه لما يقرر يبعد، بيكون عنده القدرة يكمل حياته بشكل طبيعي. يضحك، يحكي، يعيش يومه. وإحنا نضل عالقين عند نفس النقطة، نفس السؤال، نفس الشعور اللي ما بيسكت

يمكن المشكلة مش بس ب إنه راح
المشكلة إنه إحنا تأخرنا نفهم إنه من البداية كان شايف العلاقة بطريقة مختلفة تمامًا عن طريقتنا

حكي كتير بس بوجعلي قلبي انداري هسا بعمل شاي وبنام

‏أَغَارُ لَعَمرُ اللهِ أَن يَقرَؤُوا اسمَهَا
‏فَأَكتُبُ لَيلَى .. وَاسْمُ لَيلَايَ آخَرُ
‏وَيَا لَيتَنِي فِي الحَشْرِ أُعفَى فَلَا تُرَى
‏بِصَحِيفَتِي لَيلَى .. وَلَا أَنَا ذَاكِرُ

لو كانت محافظتك كائن حي وواعي زي البشري الطبيعي، شو بتحسوا رح يكون اكتر اشي بتستحي منه وكيف رح تخبيه؟

بحس اربد ممكن تضل مستعره من الاردن طول عمرها وبتسعى انها تكون العاصمة (هي فعلًا العاصمة بس مش جغرافيًا)