Честит 11 Октомври, Денот на народното востание на македонскиот народ!
Честит 11 Октомври!
Ден на народното востание на македонскиот народ против фашизмот и денот на ослободување на македонскиот народ.
"По фашистичката агресија од страна на Германија и Бугарија и окупацијата на Југославија во 1941 година, Македонија повторно е поделена, овојпат помеѓу италијанскиот и бугарскиот окупатор.
На 11 октомври 1941 година, во Прилеп, 16 партизани од Прилепскиот партизански одред „Гоце Делчев“ извршуваат вооружен напад врз бугарската полициска станица и затворот, а истовремено ги прекинале телефонските врски и електричната инсталација. Акцијата претставувала организиран почеток на народното востание во Македонија против бугарската фашистичка окупација за време на Втората светска војна.
Целта била да се ослабне окупаторската власт и да се поттикне вооружениот отпор за ослободување на Македонија. Тоа не било конечно ослободување на Прилеп, туку почеток на пошироката народноослободителна борба што продолжува и до 1944 година.
Народноослободителната борба завршила со победа над фашистичките окупатори и ослободување на Македонија во 1944 година. На 13 ноември 1944 година било ослободено Скопје, а до крајот на ноември била ослободена речиси целата територија на Македонија. Со победата над окупаторските сили и историското заседание на АСНОМ на 2 август 1944 година, биле поставени темелите на современата македонска државност".