u/tahab1992

ليبيا عندها موارد ولكن الموارد لا تعني الغنى، الغني الحقيقي هو المعرفة يعني لو عندك ٤ تريلون براميل نفط، والعالم فجأة استغني عليه، شني بدير بيه المورد هذا.

نتفكر في ايام زمان اللي يقولوا نحوا معمر لانه بيبدل الدولار بالدينار الذهبي، باهي وبدله، بسهولة يقولوا نقعه واشرب ميته الذهب لان كل شئ تقريبا تشري فيه منهم، الدواء والغذاء والبنزينه و اللبس. هما يقولوا لك شني يقبلوا مقابل خدمتهم مش انت تقوللهم.

حد بطاطا وخيار وطماطم وموز وكل الخضروات، وانت عندك ملح وحتي هو عنده غر مش هلبة زيك. انت قتله بنبيع لك الملح بالذهب وبنشري منك بالذهب، هو ببساطة يقولك مانبيش وانت اللي محتاج واللي نقوله انا بيمشي.

المعرفة وتحويل المعرفة هاذي لصناعة واكتفاء ذاتي، هي الغني الحقيقي، تونس اغني مننا لو غدوة صارت حرب عالمية ثالثة من جديد، التوانسة حيطلعوا منها، حني ماعندناش مانكلوا.

الدولة وحتي انت شخصيا تعرف قداش قوتك بعرفة مقدرك علي تحمل الكارثه لما تصير، حد طول عمره في القطاع العام وليه ٢٠ سنة فيه ويأخد ٥٠٠٠ د، وعندك موظف ليه ٢٠ سنة قطاع خاص يتنقل وينقز من شركة لشركة وبزنس لبنزنس، ومتوسط معشه ٣٠٠٠ دينار.

من في اعتقادكم حيقعد حاله كويس لو برميل النفط نزل ٤٠ والدولة قالت بنقص موظفين

في كل فيلم في امريكي حتلقا البطل في نهاية الفيلم يبوس في صاحبته وانقدها والدنيا مدمرة وارها ولا كأنه ويتم نشر فكرة ان الحب هو المخلص هو المنقذ وهو حل البشرية من كل شئ.

الشئ هذا انتقل لينا وللعالم ككل حقيقتا، وهذا علاش الزواج يفشل والناس تتفاجئ بعد الزواج بإن مشاكلها مانحتلش و ان الحاجات اللي مزعجة قبل الزواج مازال مزعجة بعده وان الحياة مش وردية بالعكس الزواج مثلا مرحلة ثانية مختلفة بهمومها وافراحها ومشاكلها ومسؤوليتها، فامتعتقدش ان الحياة زي الافلام ان لما تحب و تتزوج تبدأ الحياة فجأة وردية والجو جميل والهموم والاحزان تختفي، كيف بادي ياتشم.

ثانيا: من غير حتي الزواج والعلاقات، هي فكرة الحب يعني روجوا لها بشكل اسطوري وعلي حساب القيم الاخري، علاش مانتكلموش علي العدالة زي مانتكلموا علي الحب، علاش منتكلموش علي الابداع او الجمال او التضحية او الارث او الحرية او الواحب.

من قال مثلا ان الحب اهم من العدالة و الواجب ، العدالة والواجب اعظم وارقي من الحب بمراحل، الحب علي الاقل الرومانسي منه هو غريزة هو انجذاب جنسي لا اكثر و لا اقل، فكيف هذا الحب اهم من الواجب اللي هو الشئ العقلاني بالكامل اللي لابد ديره تحب او تكره، تموت او تحيا لانه واجبك وعطيت كلمة، لكن ترا جرب تقول لزوجتك مانديرش في الشئ س لان نحبك ندير فيه لاني واجبي ، يمكن تطلب الطلاق فورا.

فأيه، مش الحب الحاجة الوحيدة في الدنيا كقيمة ، في عرم قيم اخري اهم وارقي من الحب بمراحل،

علاش اغلب الشباب يعتقد ان من حقه يعيش كويس وكمواطن اوروبي، اوروبا علي سبيل المثال المانيا خاضت حروب كانت المعركة الواحدة فيه زي كل الحروب من ٢٠١١ وتعال جاي. فيه هلبة اعتقدات خطأ.

الالمان خدموا علي بلادهم هلبة وماهربوش او قالوا هاذي مش من مستوانا وحني نستحق مش عارف شني وشني، والمانيا مانزلتش من السماء، كانوا الالمان يخدموا ليل نهار بش يوصلوا.

ما أعتقدش أنهم فكروا يستنوا المخلص والمنقذ او حتي الفكرة المخلصة، كل واحد ناض الصبح وقرر انه يدير الصح بغض النظر.

وشئ ثاني علاش لما الشباب يقولوا نبوا نعيشوا حياتنا ديما عيش الحياة عندهم هياجة ومأكلة وشراب وسفر، علاش مش عيش الحياة أنك تفتح شركة وتساهم في بناء بلادك، ماتقولش الوضع مايسمحش عرفينا مايسمحش هذا علاش اسمه طموحه وعموما حتي في امريكا ٩٥% من المشاريع النشئة تفشل.

عيش الحياة عندنا معناها نمط حياة استهلاكي وخلاص، مش بناء شئ ذا قيمة وذا فائدة وتساعد بيه الناس.

فبجد مرات نستغرب شني يخلي حد يعتقد ان المفروض ليه نفس الحقوق اللي عند المواطن الاوروبي، وبجد نستغرب علاش يعتقد من حقه ان يعيش في بلاد اوروبية، من قاله أنه حقه.

فأيه بجد نبي نعرف شني يخلي الشباب والشابات هنا يستحقوا نمط حياة هكي، خدمتوا عليه مثلا؟

تساؤل والله مش هجوم علي حد