تجربة فاشلة من الصب-فضفضة ستُحذف
السلام عليكم ورحمة الله وبركاته
كما هو موضح في الإعلان للأسف مريت بتجربة فاشلة في الصب والحمد لله أبداً غير ندمان، لأنه الواحد يتعلم و كله خير من الله.
اللي صار إن في شابة نزلت إعلان وشفت المواصفات وناسبتني بشكل كبير وتواصلت معها ووضحنا الأساسيات من الطرفين و
مثل الred flags والdeal breakers و معيشة كل شخص و وضعه
كان فيه توافق مبدئي بشكل واضح من الطرفين ولكن كنت أحس إن ما في وضوح في رغبة الطرف الآخر أو أحس إنها تجاريني في الكثير من الأمور اللي أقولها، مو تسليك, ولكن وكأنها ما عندها تصور واضح عن رغباتها في بعض الأمور, وفي بعض الأمور ما كأنها تفكر جدياً وبشكل مسؤول فيها، مثل الانتقال للعيش من مدينة إلى أخرى. ( أنا من جدة أساسا و لكن عايش بالشرقية من 2017 وهي عايشة طول عمرها بجدة)، اتفهم انه الشخص ممكن ما يكون عنده تصور لبعض الأمور و لكن ليس معظمها و على الأقل يكون عنده تصور بأهميتها
الشاهد اللي صار عشان لا أطول الموضوع كثير, إني وضحت إني جاد وحاب الأهل يتواصلون من البداية قبل تكوّن أي شيء بيننا سواء عاطفي أو تعلق أو غيره ولكن من جهتها قالت إنها غير مستعدة وتفضل تواصل الأهل بعد ما نكون متأكدين تماماً من بعض ووضحت لها إن هذا الشيء فعلياً صعب يصير إلا بعد تواصل الأهل وشوفة و غيره خاصة إننا ودنا نبعد عن أي شيء غلط أو محرم ممكن يسبب مشاكل مستقبلاً وفي نفس الوقت البعض ممكن ينظر له على إنه .أسلوب للتأكيد بين الطرفين على إنهم يرغبون في بعض، على سبيل المثال، اننا نشوف بعض في الواقع هذا شيء مهم يفصل في ناحية القبول " الأرواح جنود مجندة "
و كما هو متوقع, انها اعترفت لي بمشاعرها تجاهي, و في طبيعة الحال كان عندي مشاعر بسيطة تجاهها و لكني أدرك تماما انها ليست حُب لا من قريب ولا من بعيد و تكاد تتجاوز إعجاب عابِر لا يدوم, و مرة اخرى طلبت تواصل الأهل ( قبل رمضان) و قالت صعب الحين لأننا بندخل على رمضان, و حددت الموعد بعد اول اسبوع في شوال بحكم انه ملكة اختها بتكون في اول اسبوع, انتظرنا و خبرت الأهل بالموعد, اتفاجئ خلال أول اسبوع في شوال بأنها قالت لي ملكة أختها تأجلت بسبب أنه المصورة اللي تبيها غير متاحة!؟ قلت طيب ينفع نتواصل قالت لا؟ سالت متى موعد الملكة الجديد قالت مدري, كان شيء غريب الصدق و قلت ممكن فيه ظرف ما تقدر تتكلم عنه, و على ما يقولون I gave her the benefit of the doubt
وعدتني بأنه ما بينتهي شوال إلا و نحن متواصلين، و على رغم طول شوال إلا انها ما تكرّمت و عطتني الرقم، في نهاية الشهر عاتبتها، و وضحت لها انه لو فيه ظرف ما تقدر تتكلم عنه توضح لي، او اي سبب، كان ردها دايم" اشوف انه مو مناسب للأهل الحين"، و وضحت لها وقتها انه الوضع مب جايز لي، و الاسبوع الجاي الأهل مسافرين و بعدها عندنا مناسبات عائلية بتشغلنا كثير ( ولادة، حفل تخرجي من الدراسات العليا في الشرقية و الأهل بيجوني من جدة، ثم عيد الحج)، و الأهل ما راح يفضون.
قالت لي خلاص تمام بعطيك الرقم، عدت ٣ أيام و هي تماطل إلى قبل سفر أهلي بليلتين، و الوالدة طلبت انهم يجون و يتعرفون زل لسان الوالدة و لمّحت اني اعرف البنت بطريقة غير مباشرة، و الوالدة وضحت انها بتسافر لمدة اسبوع، و التواصل كان عن طريق اخت الشابة، و قالت لنا افضل يكون بعد رجوع أهلي من السفر.
في أول ليلة بعد ما عودوا أهلي من السفر الوالدة تواصلت، و اختها قالت تمام بتشاور مع الوالدة و نرد لكم، عدت اسبوعين ولا ردوا، و البنت تطلع لي اعذار، و بعد اسبوعين جدتها رحمة الله عليها توفت، و كملوا ٣ اسابيع بدون لا يردون على الوالدة، الوالدة تضايقت ولا الومها، حتى لو فيه ظرف المفترض بعد كم يوم يعطونها خبر.
بعد اسبوع من وفاة جدتها الله يرحمها ( شهر و اسبوع من اول اتصال) اختها تواصلت، و قالت انه عندنا ظرف وفاة ولا نقدر نستقبل احد الحين، الوالدة عزتهم و قالت الله يكتب لنا و لكم الخير.
و بعدها وضحت للبنت انه الصدق كل الأمور اللي صارت ما تناسبني و فيه علامات تعجّب كثيرة، و انه الواضح مافيه نصيب.
هذا اللي صار بمنظور حيادي قدر المستطاع لأن كل قصة لها طرفين؛ الصدق فيه أمور كثيرة كانت مهمة و تركت فيني انطباع خلاني احيد عن الموضوع، مثل انه واضح موضوع سوء التنظيم و احترام المواعيد شيء طبيعي عندهم، واجهته فيها، ولا ودي احكم لكن حتى خواتها الثنتين اثروا علي بشكل مباشر فيه، و كل ذا عشان تعارف أهل فقط؟ كيف لو بندخل في ملكة و زواج قدام.
و تصورات البنت عن الزواج عن انه حياة وردية و رومنسية بحتة كان للأسف واضح، و كل ما اناقشها بالموضوع تقول مب كذا والله، و الفارق في طبيعة شخصياتنا aka chemistry كان و واضح
^ ياساتر كل ذا و قلت ما بطول ههههه
الدرس المستفاد بالنسبة لي لو نغزك قلبك بسبب موضوعي من البداية لا تضيع وقتك و مجهودك في شيء غالبًا ما يصلح
و للأسف الحين الأهل ماسكينها علي اني ما اعرف اختار🙃😅