التعليم في السودان
جديا يعني هتقضي 7 سنين على الاقل بغض النظر عن التخصص عشان شنو بالضبط؟ قدر ما تعاين يمين شمال مافي ثمرة بتستاهل الزمن والتعب دا كلو. للاسف يعني اشك انو الجامعات دي قادرة تخرج ناس فاهمة الحاجة الدرستها وتقدر تناقشك فيها. الكويس بكون حافظ ما فاهم. هو عارف انو الحاجة دي كدا لكن كيف جات كدا وليه ؟ مدري والله شنو هاي عموو . المهم ما جاي اعمم اكيد في ناس بتطلع فاهمة لكن مع الكم الهائل من الطلبة دا والثمرة المتحصلة الموضوع محبط. هل الخلل في النظام التعليمي ولا في الجامعات؟اكيد ما مشكلة عقول يعني لانو في ناس اذكياء وكتار. بس مرة قريت انو "القريحة كالضرع كلما امتريته در" ف انت ممكن تكون ذكي لكن لمن ما تتعلم تستخدم ذكائك دا بيروح عليك ساي. من الاساس ولحد ما نتخرج بندرس ونحفظ الكلام الفي الكتب عشان ننزلو في ورقة الامتحان. ولا يوم ما متذكر في اسئلة تخلي الطالب يشغل مخو لانو الطلبة هتعترض وتقول من " جابو لينا من برة الكتاب". الكلام كتير والوجع راقد والعين بصيرة واليد قصيرة.
مدري والله كنت عايز انزل الميم وخلاص لكن شكلي اخدت راحتي. المهم طبعا عندي راي يمكن تشوفوه مشاتر لكن هقوله، وهو انو ما الا الناس كلها تقرا. والحياة مجالاتها كتيرة فما الا يعني الناس كلها تبقى دكاترة ومهندسين وفي النهاية كل ميسر لما خلق له. لمن نبطل نشوف انو القاري تربية او قانون او محاسبة او ايا كان ما اقل من القاري هندسة او طب لانو في النهاية كلها مجالات وفنون. ناس كتار بتقرا بس قليل البتميز. الجو مسخن عشان كدا م هقدر استفيض في النقطة الاخيرة بغض النظر عن انو ممكن تتفهم غلط لكن نو بروبلم.