اللي ما يشتري "يتفرج" .. منصة مصرية لتقييمات المتاجر الأونلاين
كتير بلاقي بوستات هنا وفي جروبات الفيسبوك من نوع "حد اشترى من الصفحة دي قبل كده؟" أو "دول نصابين ولا لأ"؟ الإجابة دايما بتضيع في الكومنتات، وبعد أسبوعين حد تاني بيسأل نفس السؤال و تحتيه تلاتين كومنت "up"
و في الآخر بتقول اجرب حظي و لو جربت تشتري و كانت تجربتك سيئة او اتنصب عليك مبتعرفش تحذر الناس إزاي من البراند ده غير علي جروبات الفيسبوك مثلا اللي السيرش فيها ضايع أصلا و المعلومات متوزعة في عشرين جروب.
تقول هكتب ريفيو علي جوجل مابس .. بس جوجل مابس معندوش غير الأماكن الأوفلاين بس .. فمحلات كتير بتبيع اونلاين مش هتلاقيها عليه .. طيب علي صفحة الفيسبوك تلاقي صاحب الصفحة قافل الريفيوز أصلا و يا حظك بقي لو شاري من انستجرام او تيكتوك أصلا معندهمش مكان تكتب فيه ريفيو فبتكتفي انك تحسبن عليهم و يتحرق دمك و خلاص.
"عشان كده أنا بقالي فترة شغال علي حل للمشكلة دي .. و عشان كده عملت موقع "يتفرج"
https://yetfarrag.com/?r=egystore
الموقع بيتعمل عليه صفحة لكل متجر مصري أونلاين سواء بيبيع علي فيسبوك بس او انستجرام او علي موقع الكتروني (او علي التلاتة ) و إن شاء الله ناويين نضيف تيكتوك و تليجرام برضه
كل صفحة بيبقي عليها معلومات المتجر الأساسية .. بيبيع إيه، طرق التواصل، سياسة الاستبدال و الاسترجاع وأهم حاجة تجارب الناس اللي اشترت منه اللي بنجمعها من كذا مصدر زي تقييمات الناس علي الموقع مباشر او من تقييمات جوجل مابس و صفحة الفيسبوك زائد اهم حاجة اننا كمان بنجمع التقييمات من الجروبات
احنا الحمد لله حاليا عندنا فوق ال 1600 متجر مصري، متقسمين على 77 تصنيف زي ملابس، اكسسوارات، أثاث، مستحضرات تجميل، أجهزة منزلية وغيرها دا غير ان عندنا فوق ال3000 ريفيو من جروبات الفيسبوك.
الموقع مبني على إن الناس هي اللي تملاه مش أنا يعني هوا اقرب لمجتمع .. أي حد يعرف يضيف تقييم او متجر جديد فلو حد حابب يساعد معانا في بناء المجتمع ده في تلات حاجات تساعد بيها
١) قيّم متجر اشتريت منه ادخل صفحة المتجر واكتب تجربتك. مش لازم مقال طويل، سطرين تلاتة كويسين : طلبت إيه، وصلك في قد إيه، الجودة كانت زي الصور ولا لأ، وتعاملهم لما حصلت مشكلة كان عامل إزاي. دي الحتة اللي بتخلي الموقع نافع بجد، وبصراحة دي أكتر حاجة محتاجينها دلوقتي.
٢) ضيف متجر مش موجود عندنا دي متاحة لأي حد، مش لأصحاب المتاجر بس. لو بتتعامل مع متجر معين ومش لاقيه عندنا، من الصفحة الرئيسية فيه زرار "شارك متجر جديد". الصق لينك الفيسبوك أو الانستجرام أو الموقع بتاعهم وخلاص. الباقي بيتعمل لوحده قدام عينك: بيقرا الصفحة، يستخرج البيانات، يصنفها، ويطلعلك صفحة المتجر جاهزة في دقيقة. مش محتاج تملا فورم ولا تعرف صاحب المتجر ولا تاخد إذن منه. (محتاج تسجيل دخول سريع بس، عشان نمنع السبام)
٣) لو عندك متجر، طالب بيه هتقدر ترد على التقييمات عليه وتظهر بعلامة "مالك متحقق". مجانا، ومش بيغير ترتيبك ولا تقييمك، بس بيدي الناس ثقة إن في حد بيرد ورا الصفحة و إنك مهتم بالزبون بتاعك.
حاجتين عاوز أكون صريح معاكو فيهم:
- إحنا فعلا عندنا متاجر كتير ، بس التقييمات لسه مش كفاية. ومن غيرها الموقع مش هيحقق الاستفادة للجميع
- مفيش إعلانات مدفوعة ولا ترتيب بفلوس. كل المتاجر بتتضاف بنفس الطريقة، وصاحب المتجر ميعرفش يشيل ريفيو او يغير في التقييم بتاعه
https://yetfarrag.com/?r=egystore
: اللي محتاجه منكم دلوقتي: ادخلوا وقولولي إيه رأيكوا في الموقع بصراحة و إذا في أي حاجة ضايقتكوا فيه أو حاجة تحبو اني اضفها. النقد الحقيقي حاليا أنفعلي بكتير من أي حاجة تانية. ولو متجر بتحبه مش موجود، ضيفه بنفسك أو ابعتلي اللينك وأنا أضيفه. ولو المودز شايفين إن البوست مش مناسب للصب، عادي امسحوه.
