Dä Rundchopf Ruedi betritt s Rampeliecht!
Gschätzti Eidgenosse, Nachbere und Bünzli
Ich möcht mich gärn churz vorstelle: Ruedi min Name.
Erfolgriiche Önträprönör, Büsinessmaa, Verhürootet mit de Magdalena, Vater vomne Bueb undeme Meitli. Ich stahn für d Leischdigsgsellschaft, de Stolz als Schwiizer ufgwachse z sii und für guetbürgerlichi Politik (me dörf das doch wohl no säge!). Mini Meinig isch di einzig richdig, aber ich wird eu garantiert druf ufmärksam mache, wenn ier falsch ligged.
In minre Freizit duen ich gärn Rasemeie, Tennis luege und dä Wältwuche-Livestream vo mim Büsinessguru Rosché Köppel luege. Mini Frau kümmeret sich i däre Ziit um de Hushalt und d Chind.
Freut mich, zum eu all bald mal kennelehre! Wenn ier frage händ, wird ich si nach beschdem Wüsse und Gwüsse patriotisch beantworte!