بالنسبة لي الفترة الدرامية لن تتكرر .. كل يومين هوشة جديدة وممتعة وتسفيل شديد بواجهات اليوتيوب اللي محد كان يتخيل أن من الممكن انتقادهم اصلاً
الاسوء فترة الصاعدين رغم أن برز فيها ناس رهيبين كثير بس في نفس الوقت فيه أكثر منهم اللي مواضيعهم مكررة من مقاطع الأجانب أو ناس بدون شخصية ويلعبون عالمضمون ويكررون نفس الكلام لدرجة مرات أضغط على مقطع جديد وأشك أنا تابعته قبل ولا لا
انا والشباب اعطينا فكرة الباكرومز أكبر من حجمها قبل نوصل للسينما وحمّلناها الكثير من الأفكار والنظريات وأبحرنا بخيالاتنا والكثير من النقاشات العبيطة والرهيبة .. وكنت متأكد ما راح يتم تطبيق ولا ١% من الأفكار اللي مستمتعين في سردها ومناقشتها لأن السينما اليوم تلعب عالمضمون والمخرجين مجملاً جبناء وغير مستعدين للمغامرة إطلاقاً أو بالأصح مفتقرين لموهبة كتابة القصة
وبالفعل الفلم كان لا يرتقي لمستوى السينما وفيه تمغيط وتمطيط واضح وفاضح! وين وصلنا الفن السينيمائي يستعين بحيل الأنمي الرخيصة .. وحشو أفكار بس عشان يوصل لمستوى يخوّله يطلق على نفسه تجربة سينيمائية .. تجربه شبيهة بتجربة الخلاط ودليل آخر أن الإبداع في اليوتيوب اما يبقى على نفس أفكاره وبساطته أو لا يدخل السينما .. بس هالكلام غير منطقي لأن الكل يبي الفلوس بأي طريقة
محاولة إقحام العظة والعبرة بالشكل الطفولي البدائي بالأعمال السينيمائية أصبح لا يطاق .. كل فلم أياً كان تصنيفه لازم اشوف القصة من منظور شخص يعاني بحياته سواءاً من الوحدة أو عدم التقدير أو اي شي من هالجانب ونوصل للنهاية إما الشخص يعالج مشكلته أو مشكلته تقضي عليه .. طرح ساذج وموجّه لأطفال
الباكرومز كفكرة أصلاً ما تحتاج قصة إنسانية تقليدية وعبرة عن الوحدة والتقبل والشفاء النفسي **ياخي اسم الفلم باكرومز .. خليني اشاهد باكرومز!**
الأخطاء القصصية بالجملة مثل تسارع الأحداث بشكل غير منطقي وتتخلله ثغرات وفراغات ومن دون أي تفسير يُذكر وكأن الكاتب استعان بالذكاء الاصطناعي لكتابة القصة .. الفراغات في القصة ما تخدم الا البطل عشان يوصل للمشهد اللي يبيه الكاتب ويقدم الفكرة حقته كأنه مسرح مدرسي
عالأقل الجانب البصري كان رهيب .. وهذا هو الشي الوحيد اللي يعرف يسويه المخرج .. انسان يعرف يصمم أماكن غريبة بشكل اكثر من رائع بس ما يعرف يكتب قصة
أيضاً الموسيقى تعطي احساس نوستالجيا غريب وترسخ بالمخ ومتناسبة بشكل فضيييع مع الباكرومز نفسه
مجملاً فلم كان بالإمكان اختصاره بمقطع يوتيوب مدته ١٥ دقيقة ولا أنصح بالذهاب له ومشاهدته ابداً والمفروض يجي فاعل خير يرفعه تورنت بنسخة محسنة بنفس المدة اللي ذكرتها