u/Albwardi

اول مرة انزل صيفي اقدر اختصرها ب جامعة اشباح من كثر ما هي فاضية

أنا عارف إن الأوضاع الحالية من جرف لدحديرة الفتره هذي ، ومحاكيكم خسران وهاذي نتايج المحفظة الخاصة ب العملات البديلة ( غير البتكوين) خلال 30 يوم ، وحالياً الوضع سيء. بس هاذي مب المرة الأولى اللي أمر فيها بهذه الخسائر ب (العملات البديلة ) فقد مريت بأشد منها. خصوصاً في تاريخ 12 أبريل 2024، ما انسى ذا اليوم يوم كنت في تركيا، وتحديداً إسطنبول، كنت في شقة مع اثنين من أصدقائي (قصي وأسامة). قررنا ليلة 12 ابريل (ثالث يوم عيد فطر ) نجلس في البلكونة نسوي شاهي لان الجو كان حلو وقتها ، و يوم شفتهم يجهزون المكان قلت يا شباب بروح أتروش 10 دقائق وأرجع. كنت مستثمر وقتها بعملة اسمها (ENS)، وكنت حاط فيها 2 مليون ريال سعودي ( ما دخلت من الباب لطاقة جلست فتره ادرس القرار )المهم ، والله إني قبل أدخل أتروش كان رصيدي في هذه العملة 1.8 مليون ريال. دخلت أتروش، وكان صوت الدش قوياً بحكم ضغط الماء، وفجأة بدأ أسامة يدق باب الحمام بقوة، طفيت الدش وسألته بصوت عالي: "شفيه؟!"، فرد عليّ: "الحق السوق، الحق السوق!". تجاهلت كلامة في البداية وقلت في نفسي هذا مفلم ومكبر الموضوع، وأكيد خسارتي بسيطة خلصت وطلعت ولبست وفتحت جوالي، وللأسف وجدت المحفظة تنزف بشكل لا يتخيله أحد؛ كنت حرفياً أخسر كل دقيقة، وفتحت الأخبار وشفت خبر ضرب إسرائيل لإيران، وكان تأثيره كبيراً جداً على السوق. تمالكت نفسي وجلست ب البلكونة اشرب شاهي ونسولف وانتهى اليوم ورصيدي في (ENS) حول الـ 700 ألف، خسرت أكثر من نصف استثماري في ليلة واحدة. حزنت طبعاً، لكن ما بيدي حيلة هذا قراري واتحمل عواقبة قررت، وهو القرار الصحيح، أني أخلي المتبقي 700 ألف ولا أبيع، وإذا نزلت العملة أكثر سأعزز فيها. وبعد مرور 3 أشهر تقريباً، تحديدا شهر 7 ناسي اي يوم من ايام الشعر قدرت أبيع الـ (ENS) بـ 3 مليون ريال. رسالتي لكم: أنت دخلت وقررت، تحمل نتيجة قرارك بدلاً من البيع بخسارة والهروب؛ واجهها وفكر في الطريقة الأنسب، وعزز إذا قدرت بعد ما تتأكد من قرارك، لا تهرب، لا تهرب، لا تهرب. مشكلة العملات والأسهم أن دخولها سهل، والمضحك في الموضوع أنك تجد الشخص إذا جاء يفتح مشروعاً على أرض الواقع يتعب بدراسة الجدوى ويحسب مليون حساب، لكن إذا جاء يشتري سهماً؟ عادي يشتريه وهو أمس سامع عنه. رسالتي هي: واجه قراراتك، وبدلاً من وضع اللوم على السوق والغير، تذكر أنك أنت من قررت وأنت من دخلت. لا تعتقد أن الدنيا سهالات بمجرد دخولك ستربح، ولو كان الموضوع بهذه السهولة لما تركه لك الآخرون، وشفت الكل يسويها. ومعلومة على السريع: لا تحسب نفسك ذكي في السوق

لي ٥ سنوات مستثمر ب راس مال ثقيل جدا لكن اقل نصيحة اقدر اوصيها لكم لا تدخل بسوق متقلب سواء اسهم او عملات او فوركس الا وانت عندك كاشش يساندك اذا بتدخل بمبلغ تخاف تخسرة بتدمر نفسك