استشارة زوجية وفضفضة
السلام عليكم ورحمة الله وبركاته
الموضوع جدا جدا طويل بس بحاول اختصر قدر المستطاع.
فاللي ناوي يقراه كامل يجهز فشاره ولا قهوته لاني انا خلاص صدري فيه ضيقة من زوجتي واخاف الشعور في قلبي يتطور الى كره وانا ما ابغى ذا الشيء
بسم الله الرحمن الرحيم
اخوكم في الله تزوج زواج تقليدي من بنت عمه منذ الصغر والعائلة تقول ذول الاثنين لبعض، شخصيتي ؟
انا انسان هادي وقليل الكلام ومحترم فالاغلب يخطئ بأني ضعيف شخصية وبعدين ينصدم من الامر الواقع ما بقول اني انسان متدين لكن الحمدلله محافظ على الصلاة فالمسجد. عايلتي تعتبر مفككة لان امي ما رضت تحضر زواجي لا هي ولا اخوالي الستة ما علينا.
زوجتي مب بعيدة عني من ناحية الشخصية يعني تقريبا متشابهين
زي ما قلت زواجنا تقليدي فالبداية كانت مشاعري مجرد اعجاب بسيط بعد الملكة تحولت الى حب والان بعد الزواج اصبحت نفور.
انا قبل ما املك كلمتها واكدت عليها ان هذا قرارها الشخصي اكيد لاني خفت امها ولا ابوها يضغطون عليها توافق لاني ( في نظرهم ) الرجل المثالي متدين وقمة الاخلاق ومحترم وراتب زين بيصون بنتنا ويكرمها.
فهي وافقت وتوكلنا على الله ووصلنا لليوم ٣ اسبوع من زواجنا وانا الان فيني ضيقة في صدري ما يعلم بها الا ربي وما ابغى اكلم احد من العائلة فقلت باخذ آراء من اشخاص متزوجين وعندهم خبرة
طبعا بس حطوا في بالكم اتفقنا نخلي شهر العسل بعدين عشان هي عندها تدريب وانا عندي كورس مهم لعملي المهم خلال ال٣ الاسابيع الماضية فيه تصرفات منها تضايقني
١- انا صراحة بعد الزواج تغيرت مرة بتقول كيف ؟ انا ما كنت اقعد فالبيت وعلطول خرجات وطلعات مع الزملاء وما ارجع البيت الا متاخر ( كنت ساكن عند اهلي ) بعد الزواج صرت ما احب اطلع صرت افضل اني اقعد فالبيت مع زوجتي ونسولف ونضحك.
من الاخير اي فعالية ما كانت تتضمن زوجتي كانت مملة بالنسبة لي لكن للاسف ما احسها تبادلني ذا الشعور الى الان ٦ مرات طلبتني تروح عند اهلها ووديتها واحنا تونا متزوجين ودايم تجلس الى وقت متاخر ( تكلمني الساعة ٢ او ٣ الفجر ) اجي اخذها
طبعا قلت لكم بطبيعتها هادية وقليلة كلام ما عمرها فتحت اي سالفة معي لازم انا اكلمها اول
فروحتها عند اهلها وتقعد كل ذا الوقت الطويل صراحة ولدت غيرة في داخلي وشعور بالنقص معقولة الجلسة معي سيئة لدرجة انها تجلس لين الفجر ؟
٢- التقصير في الحياة الزوجية … بطبيعة الحال كزوج عندي رغبة في تلبية جميع طلبات زوجتي ومن عشقي لها ما يطاوعني قلبي اقول لا لاي شيء فمستعد اضحي باي شيء وفالمقابل ما ابي الا القليل من التقدير او الامتنان …
انا متعود اذان الظهر اصحى من النوم وخلاص معد انام بعدها الا فالليل لكن زوجتي .. تقوم من النوم ٥:٣٠ او ٦ المغرب تسوي لنا قهوة وبعدين العشاء … يعني ما ادري صراحة عن الاناث هل هم احساسهم بالجوع غير عننا لكن طول اليوم جالس بدون اكل فاغلب اليوم انا ميت جوع.
طيب ما عندي مشكلة وجبة وحدة فاليوم الله يعطيها العافية وتسلم ايديها بس يعني مو الاحسن يكون غداء ؟ تكون فنص اليوم بدال ماهي اخر الليل وطول اليوم جوع.
طيب دامها وجبة وحدة فاليوم المفروض تكون دسمة صح ولا لا ؟ عشان تسد الجوع.. لا طبعا مرات تسوي اندومي ولا نواشف..
لحد يفهمني غلط انا قنوع جدا وما اتشرط في الاكل واحمد ربي على النعمة حتى الاندومي احبها وترى اعرف ادخل المطبخ واسوي لي الاكل اللي ابغاه بس لما زوجتي تطبخ لي هذا الشيء يغمرني بسعادة ما اقدر اوصفها ويحسسني بالشكر والامتنان ولكن الان …
امس كالعادة صحيت الساعة ٦ سوت لي قهوة وقالت لي عادي توديني السوق بعد المغرب ؟ بقابل اختي ( حزت فخاطري وتضايقت مرة ولا كليت شيء ) فطبعا وديتها وكلمتني الساعة ١٢ اخذها وجت ولا سالتني وش سويت ولا وش اكلت.
صرت احس وجودي فالبيت غير مهم
٣- اخيراً الجماع …
موضوع محرج شوي لكن هذي ميزة ان كلنا غرباء ومحد يعرف الثاني
عموما بداية الزواج كانت هي تفكيري الشاغل ومجرد رؤيتها كان يثيرني لكن الان ؟ صرت اصد عنها فالسرير ولا ابي اشوفها والسبب بكل بساطة لاني احس اني اجامع دمية … انا متفهم ممكن بالنسبة للاناث الموضوع يكون محرج فالبداية فلازم الرجل يبادر فانا اسوي كل شيء من كلام دافئ ، تقبيل ، لمسات ، ومشاعر زوجية. ولكن هي العكس تماما. ما اقول هي جامدة كالدمية بالضبط ولكن اذا لم افعل شيئا فهي ايضا لا تفعل شيئا فقط تجاريني. منذ بداية زواجنا وهي الى الان لم تقبلني ولا مرة او تلمسني من المنطقة السفلية… انا حريص جدا على نظافتي الشخصية ودايم اخذ شاور واتطيب قبل النوم… فاستبعدت مشكلة النظافة.
عموما ذا الشيء حسسني انها مو متحمسة مثلي او انها ما ترغب فيني هي تفعلها فقط عشان تعطيني حقي من الزواج فصار ما عندي اي شهوة لها.
اعتذر على الاطالة لكن الموضوع جدا شاغل بالي حتى الصلاة يارب سامحني مافيها اي خشوع وبدات تراودني افكار اني اتخذت قرار خاطئ بالزواج.
يا معشر المتزوجين سواء اناث او ذكور كيف اواجه ذا الموضوع ؟
انا حاليا صرت بارد تجاهها ما اكلمها الا قليل واتجاهلها وما صرت ابادر فالسرير على امل انها تلاحظ ان فيه شيء غلط وتسالني واقولها كل اللي فخاطري.
حتى الان جالسين فالصالة وبالعادة نتابع مع بعض لكن الان انا مشغول بجوالي اكتب الكلام ذا وهي تغير المقطع كل شوي مدري اذا كانت هذي محاولة لجذب انتباهي على اساس يعجبني شيء لكن انا تعبت…
غالبا كثير راح يقول لي صارحها لكن للاسف انا متخوف من الرد
Edit : شكرا لكل من راسلني عالخاص
الهدف من البوست كان فضفضة وتخفيف الحمل اللي على صدري فقط
بقرا تعليقاتكم ونصايحكم واحذف الحساب