في المواصلات والساعة يادوب 7 صباحا والناس ماشة تفتش في ارزاقها
في واحد اتحرش بي بت في المواصلات ..والبت بعد ما كوركت فيهو وقالت الا توديهو القسم
هو عامل فيها مندهش وبتلفت نظام انا ما عملت شي.. والبت دي بتألف مع ابتسامة بلهاء
عولاق زي دا ما قابلني ..المتحرش لانو غبي قايل انو لو اتحرش ونجا مرة ..ممكن ينجو كل مرة ..فعشان كدا بنصدم لمن يلقى ردة فعل ما متوقعها
انا مع انو المتحرش يتكفت لا قسم لا بخاخ فلفل..
تعبتا بعد اسبوع من المعافرة والجري والمسؤوليات المابتنتهي دي..ولاني خليت الشكية من مدة..والافكار الانتحارية خلتني لانو شافتني ما جادة
قعدتا اخطط لحياتي وقررتا انو مرحلة الشيخوخة حتكون احسن مراحل حياتي..افطر مرتين واشرب الشاي وانا قاعدة في مكاني
اليوم كله اتونس ..لا مسؤوليات لا تفكير في المستقبل لا هم لا غم ..اولادي ونسوان اولادي وأطفالهم مالين البيت
لو كحيت ساي يودوني المستشفى
ويكون عندي واحد مغترب يرسل مرة عمرة ومرة زيارة
ذكروني فوائد الشيخوخة تاني شنو..
ومدام هنالك املٌ فسنحيا
متابعة مع دكتور اسنان اللي هو يفترض احسن دكتور في المنطقة حسب اقتراحات ناس لي
في المرة الفاتت وهو بشتغل في ضرسي ..مرة يتونس مع دكتور جا خاشي العيادة ويسألو عن الاسعار وعن الشغل ومرة يسرح في الشاشة القدامو
وهم عاملين الشاشة عشان المريض يسرح فيها
والغريبة انو الشاشة بس بتعرض الناس بطوفو في الكعبة وفي الخلفية قران كريم ..يعني انا اندهشت هو بسرح في شنو ..مشاهد متكررة
بكتب الكلام دا لاني غضبتا بعد الجلسة جدا ..انو كيف ما نبهتا الدكتور دا انو يركز في شغله
حكيت الموضوع دا لكم شخص وشافو انو الموضوع عادي وبيحصل!
الشغل المخرمج والكلفتة دا شي عادي؟
بايع يعاملك بعدم احترام تشتري منو عادي ؟!
شخص بتونس بدل يركز في شغله اللي انت دافع فيهو قروش و وقت ..دا شي عادي !
بالله قولو لي الموضوع ما عادي وانو دا تجاوز وانو انا ماقاعدة اكبر المواضيع ساي😂
لي مدة بفكر في كلام محمود درويش لمن قال
"لم يمت احد تماما تلك ارواح تبدل شكلها ومقامها"
هل بتؤمن انك عشت حيوات سابقة وممكن تعيش حيوات جاية؟
هل خضت تجربة روحانية خلتك تعرف تفاصيل عن حياتك السابقة؟!
عملت شنو في حياتك السابقة وكان جزاك انو تكون عايش في السودان في هذه الحياة؟
هل كانوا سودانيين بمحض ارادتهم ؟
في حاجات كتيرة عملتها عشان الناس عملوها او الناس شايفين انو دا الصح
حكاية الصح والخطأ والناس الشايلين قلم أحمر ويصححوا من طرف ..دي بقت حكاية مزعجة بالنسبة لي..
دا غير انو انت بعد شوية تلقى روحك بتطبق نفس الطريقة مع نفسك ومع الاخرين!
تلقى روحك اتبرمجتا تماماً
فجأة تلقى نفسك متبني قيم ومعتقدات ما بتناسبك ..تتصرف زي ما الناس بتتصرف..نفس الاشياء كأنك مسخ
​
انا في مرحلة بين اني ما كان عندي حدود ولا بقدر اقول لا ..وبين المرحلة الحالية بفرض الحدود بقسوة وبكون حاسة بغضب
كيف اقدر اوازن؟
اتعودت انو ابتعد عن الناس ..بحكم انو عندي معتقدات من الطفولة انو الناس ممكن يأذوك او يستغلوك..
ولسه بؤمن انو في ناس سيئين وناس بتكون قاصدة تخليك ما مرتاح وتخليك مرتبك بس ما كل الناس كدا
مؤخراً بديت افتح قلبي بعد سنوات من الانطوائية والبعد من الناس..لسه الخوف موجود ولسه عدم الامان والاحساس انك مهدد موجود..
بس بديت اعمل حدود قدر الامكان..اقنع نفسي انو اذا حصل اي شي انا بقدر احمي و ادافع عن نفسي..
من امس عملت تحدي في تطبيق بساعد على تتبع العادات
وفي التحدي قلت اني يومي حواقول لا لشخص
لانو انا من الطفولة ما بقدر اقول لا او ارفض طلب ..وبشوف انو كدا الناس حتزعل وما حتحبني.