سبحان مقسم الارزاق
السالفة بأختصار، تزوجت ودفعت فوق ٢١٠ الف ريال (حنا ناس ع قد حالنا وهذا مبلغ كبير) ومن قوة أني بعيشها عيشه كريمه اخذت فلة بقرض عقاري على دعم سكني بناء على الخريطة يعني تحتاج وقت عشان تخلص. كنت مسكنها بشقة جديدة محد سكن فيها قبلنا ومودرن.
وبعد شهر العسل في دولة اوربية وبعد ما اعطيتها احسن ماعندي، طلبت الطلاق لانها حسب ماتقول ماتشعر بالأمان معي.
وبعد محاولات إصلاح اعطيتها الطلاق.
مريت فيما مريت فيه من ألم قهر وشك وتعب والله وحده يعلم ما مريت فيه خصوصاً ان علي قرض وفلوس صرفتها.
مضيت بحياتي والحمدلله حصلت بنت وتزوجت لي حوالي شهرين.
وطبعاً زوجتي طلعت مستفيده من الدعم على قرض عقاري لبيت بأسمها والبيت ساكنين فيه اهلها.
اكتشفت اني لو تزوجتها قبل طليقتي كان انا انحرمت من دعم سكني الحكومي وانحرمت من الاعفاء الضريبي وغيرها من الفوائد لان الحكومة بتقول زوجتك عندها بيت ما راح ندعمك.
ولو هي تزوجتني وأنا مستفيد من الدعم، كان هي انحرمت من الدعم وقالوا لها زوجك عنده بيت ماتستحقين الدعم.
لهذا كتب الله اني استفيد من الدعم في زواجي الأول وشراء فله كان من المفترض تكون لي ولطليقتي(الدعم فقط للرجل المتزوج- ويسقط عني الدعم بعد الانفصال ولايرجع الا بعد ما اتزوج)، وزوجتي كتب الله لها إنها تستفيد من الدعم قبل لاتتزوجني.
والآن البيت يبي يخلص هذه السنة ونسكن فيه أن شاء الله وسبحان مقسم الارزاق: كلنا استفدنا من دعم حكومي بدون تخطيط ولاندري.
قلت اشاركها هنا لاني اقضي حوائجي بالكتمان ولا احد يعرف اني عندي بيت إلا زوجتي (اهلها مايعرفون ان عندي بيت) واخواني (واخواني مايعرفون ان زوجتي عندها بيت) لهذا ماعندي مكان اشاركها .