بعد ال١٨
قبل ال١٨ كنا مجموعة من حوالي ال٦ أشخاص ، شو ما يصير معنا بنقوله و بنطلع سوا عالأقل كل اسبوع مرة و كلنا على عقل بعض ، ما في حدا منا كان عنده أفكار واضحة فكانت الأمور بالسليم
بعد ال١٨ بلشت الشلة هاي يظهر على الي فيها ملامح فكرية واضحة ، و اول واحد منا ظهرت عليه هاي الملامح طلع بحجة انه إحنا مش اصحاب دين ، كان شب محترم و شاطر و اتجه اتجاه ديني بمجرد ما خلصنا توجيهي و صار يدخل بسوالف العقيدة و المذاهب و الصوفية و مش عارف شو، و صارت علاقته مع شيوخ و ختايرة و يطلع و ييجي معهم
بعديها الشب الثاني كان العكس تماما ، بلش يتغير و صار تبع نسوان و تبع فياعة و همالة و نصب و حرمنة ، للامانة الشب قلبه طيب بس دينه سكر حلو
الثالث و الرابع كل منهم صار شب إيزي ، من جماعة إليسا و أصالة و الاخرس و مش عارف مين و صورني ببلاك و صورني و انا بشرب ماتشا و هالسوالف
الخامس صار أبو العجيان ، و سوالف عشاير و قبايل و ان ما انحلت تنحل بفنجان قهوة ، لكنه للامانة فعلا صاحب نخوة
و السادس انا , و لليوم ما بعرف وين موقعي من كل هالكلام ولا بعرف شو أفكاري و شو أهدافي
بضل أحس حالي بعدني عالق بمرحلة كنا كلنا فيها زي بعض