هل ممكن علاقة قوية جدا بين اخوات ترجع بعد مقاطعة سنين وكل واحد عنده حياه منفصله في قارتين مختلفه؟
انا واخويا كنا طول حياتنا اقرب صحاب لبعض برغم فرق السنين البسيطه بينا، ومراحل الدراسة المختلفة، وصحابنا وخروجاتنا مختلفين.. بس مكانش ابدا في حد اقرب لحد مننا قد بعض. للاسف لما كبرنا امي تسببت في مشاكل كبيرة بينا، صادف وقتها كان عنده نوبة اكتئاب شديدة وانصاع لها بدون اي تفكير في الصح والغلط لانها كانت مهتمة بيه اوي. واتفرقنا من وقتها بعد ما حصل بينا كل انواع المشاكل اللي تتخيلوها، للاسف كل محاولاتي لمساعدته فشلت وتسببتلي في مشاكل عميقة جدا في حياتي، وكل مرة نتواصل مهما طالت المدة بيننا مفيش في قلبه ليا اي لين، كانه نسى كل حاجة عشناها. مش بتكلم عن مشاكل الاخوات العادية دي، قصدي انه اتبدل العكس تماما، مع كل علاقات حياته بالمناسبة.. بس انا عشان كنت اقرب حد ليه فكل الضربة جات فيا تقريبا. بقا منطوقه بذيء اوي وبيأذي اللي حواليه، مسح حدود الاخرين تماما، بيمد ايده، بيقلب عليا اخواتي الباقيين، بينهش فيا اوي بالكلام والفعل كانه مدمن حقيقي مش بهزر.
جالي وقتها اكبر ازمة نفسية في حياتي، استمرت معايا حوالي سنتين.. كل الناس اللي نعرفهم اتدخلوا وكلهم اجمعوا ان المشكلة غير قابلة للاصلاح عشان هو بقا صعب اوي. اكبر حاجة كانت واجعة قلبي بعد الالم اللي اتعرضتله، هو حاله الجديد.. والدته شايفة انه زي الفل وبتديله جرعات مهولة من الاهتمام وبتأيده مهما عمل وده بيخليه صعب يشوف اي حد او يحس بالاذي اللي بيعمله للناس.
بعدها جالي عقد عمل برة وسافرت وسبت قلبي عنده يمكن لو فاق يفتكرني. وسافر هو كمان بعدي لبلد تاني ورغم بعده عن والدته الا انها بتتواصل معاه بشكل مكثف يوميا وده بيزود الفجوة بينه وبين الناس اللي في حياته.
بس طبعا من قبل السفر واحنا متقاطعين تماما ووالدته مبسوطه بالوضع جدا وبتقولهالي في وشي عادي :)
انا فقدت امي من زمان اوي بالمناسبة "نفسيا" وهي دايما بتحاول تبعدني وانا احترمت ده وبعدت من زمان اوي، ولما كانت بتقولي انها مش بتحبني، كنت بقولها من ان ده حقك مش لازم الانسان يحب كل الناس في حياته (وانا كنت وقتها عيلة بجد) ومن بعدها ما تعرفش عني حاجة بس انا ببرها وبوصل رحمي فيها مهما تعمل عشان الواجب.
بس فقدان اخويا هو اللي كسر ضهري بالمعنى الحرفي واتبهدلت اوي اوي بعده.
من كام يوم كنت بتفكر ان ازاي في الجنة ربنا هيشيل الغل من القلوب وحتى الناس اللي سامحوا ناس ادوهم في الدنيا مش هيكون في اي حاجة في القلوب تجاههم خلاص، وفكرت اننا ان شاء الله لو اتقابلنا في الجنة هيكون صاحبي اللي قضيت معاه اكبر جزء من حياتي وهيكون بعيد عن رحمه مامته والاكتئاب، دمعت عيني واشتقت اوي للحظة دي، وقولت اسألكم جايز في حد مر بالتجربة دي هنا وعلاقتهم باخواتهم رجعت قبل ما يموتوا.
انا طبعا مؤمنه بحكمة ربنا وشايفة الوضع على حقيقته ومعنديش امل انه هيتصلح الا لو اتبذل فيه جهد تغيير حقيقي من الاطراف كلها، وده يكاد يكون مستحيل. بس قد كم الزعل والعتاب اللي جوايا ليه، اتوقع عمري ما هبطل افتقده (نسخته الحقيقية مش المعتله). اتمنى يسامحني اني قاطعته لو مت قبله، مقاطعتي كانت الورقة الاخيرة وتضحيتي بآخر حاجة بينا ممكن تخليه يرجع في يوم من الايام عن اللي هو فيه ويستوعب اللي حصل. لاني عارفة ان لو (زي كل الناس اللي في حياته) كل حد بيتأذي منه جامد ويرجع يتواصل معاه ويتأذي جامد ويدخل اللوب دي، عمره ما هيحس انه غلط.. فقولت لو تواصلنا هيكون مسكن ليه مش هديهوله، حتى لو كان اخر حاجة بتربط بيننا للابد.
طبعا الموضوع ده من زمان اوي بس انا اللي بgrief it كل فترة كدة. وبقعد اسمع night changes و where’d all the times go واقول at least we share the same blood, maybe in another universe والكلام ده عشان اكل بعقلي حلاوة واهدي افكاري عشان اشوف ورايا ايه
يلا اقعدوا بالعافية وربنا يخليلكم حبايبكم.