العلاقة بين الأكل والطبقة الاجتماعية
في الفترة الأخيرة أختلطت بناس كتير من طبقات مختلفة، عكس الأول كنت عايشة في أشبه ما يكون بفقاعة، ماكنتش بقابل ناس كتير من طبقات مختلفة اللهم إلا كل سنة مرة وغالبا ماكنتش يختلط بيهم اوي، لكن في عملي الحالي الفرصة جات لي وعايشت زميلاتي في العمل لأكثر من سنة و اللي كانوا -بالمناسبة- من طبقة اجتماعية أعلى مني ( فيه منهم أعلى حاجة بسيطة وفيه منهم ما شاء الله أعلى طبقتين مستريح).
المهم، إني لاحظت قد ايه ده كان بيأثر على التالي:
نعيم الجهل التذوقي.
بصراحة (ومكسوفة من الاعتراف ده بعض الشيئ) أنا حد اتعود ياكل اللي موجود ويقدره من غير تفكير كتير واستطعام كتير، أو حتى تطلعات أنه الطعم كان ممكن يبقى أحسن من كده وده بالتالي خلى مصطلحات زي كلمة "أفتر تيست"؛ أو الطعم اللي بيجي في نهاية تذوقك للحاجة ماتجيش على بالي.
كنت عايشة في نعيم الجهل التذوقي.
أنواع المخبوزات اللي قابلتها.
الكتييير والفروق الصغيرة وأسعارهم اللي مش صغيره كانت أول صدمة بالنسبة لي، لما البنات جابوا المكتب أنواع خبز مختلفة زي خبز البريوش، و خبز الساوردو - مش محتاجة اقولكم طبعا اني ماكنتش اعرف أنه فيه اختيارات أكتر من (العيش البلدي، الفينو، التوست).
"هنفطر ايه النهاردة؟"
أحيانًا كنت ببقى مصدومة ومكسوفة من المنيو لما يقولوا لي "احنا هنطلب من كذا تحبي تطلبي معانا؟" ولكن لما كنت ببقى قابضة كنت بقول يلا نجرب ونوسع معرفتنا بدون تبذير- أصل ليه اجيب رغيف عيش ب٢٠٠ جنيه على الصبح بردو!
الصدمة الحضارية.
من البداية كان باين عليا أني عمري ما جربت هذه الاختراعات؛ فكنت بسألهم عن ترشيحاتهم خوفا من المجهول. أحيانا كنت بصارحهم أنه الأكل طلع معقول بس أقل مما توقعت بالنسبة للسعر، وأحيانا أخرى كان ✨مدهش✨، كأني اكتشفت خلايا تذوق جديدة في لساني! الموضوع كان أحيانا بالنسبة لي عامل زي الصدمة الحضارية لدرجة لما كنت بجرب أكلة أو طعم جديد كنت بسيب منه حتة آخدها معايا للي في البيت، زي الكائنات الفضائيه لما تزور الأرض وتاخد عينة عشان تدرسها مع أقرانها.👽
من المواقف الطريفة اللي حصلت لي: جبت لأخويا الصغير تريليتشي، فبيسألني ده عبارة عن ايه؟ قولت له ببساطة كيكة ومحطوط عليها لبن- راح مقاطعني: أم علي يعني!!
وأخيرا، التجربة دي بحلوها وغريبها خلتني أُقَدِر أكلي وهويتي وانفتح على تجارب جديدة من غير ما أحس بتهديد أو دونية، وأكون ممتنة لربنا على حاسة التذوق.
هل بتحسوا بعلاقة بين الطبقة الاجتماعية والذوق في الأكل؟
ايه أول أكلة اتعرفتوا عليها من برة دايرتكم الاجتماعية؟