في الجزائر هذي لقطة هي جريمة وممكن تدخل عليها لسجن تخيل فقط ، بلا مانحكي على سب وشتم من الناس ليتفوت عليك..
ولكن تخسار الهدرة في الزنقة و تجبد ز...ك تبول على شجرة قدام الناس وتحكو ليس جريمة ..
الإنسان الغربي ما بعد الحداثي شاف أهوال الحرب وشراسة الموت لذلك نمت بداخله أزمة معنى وقعدت تنمو وتنمو حتى اليوم لدرجة عند البعض ولات إدمان لكشف المعنى، يعني الإنسان في دول العالم الأول دوك ينوض الصباح يفطر فطور صحي ويمارس الرياضة ويلعب مع الحيونات نتاعه سوا كلابه ولا القطط ويقصص حشيش تع الحديقة نتاعه ويسقي نباتات نتاعه، ويروح يخدم سوايعه ويخلص ويروح يبدل الأيفون لاخر تع أحدث إصدار ويكمل السهرة نتاعه مع الجيرل فريند نتاعه، بعدها في الليل يروح يولي يسأل روحه أنا شاني ندير وأنا وش أنا وواش هو معنى حياتي؟
أنت عندك في الجزائر الوضع نتاعه والحالة الحياتية مختلفة بزاف، يعني تنوض الصباح تضرب فيها قهوة كحلة مزيرة مع الدخان حتى صدرك يولي يحرق، وتولي تجري مور طرونسبور باه توصل لخدمتك وكي توصل تلحق روطار ويحسبلك المدير سوايع الروطار ويبقى يحرث عليك في الخدمة، كي تكمل الخدمة تروح تستنى سوايع في المحطة باه يجي الطرونسبور تركب ومكاش وين توقف تولي محشور بين الناس في السخانة، ومكاش جيرل فريند باه تهبط تصويرتك سطوري بسك تولي في كروبات الفضائح، ايا مع تلحق لدار مش قادر تولي تعنق السرير نتاعك وكل يوم هكذا بنفس الروتين ...
وعلى الرغم من ذلك الحياة في الجزاير شغل ساهلة هه، يعني كامل الشكيل لي يصرالك ملي تنوض الصباح من القهوة والدخان حتى توصل وين تعنق السرير بالأحضان نروح نسأل نفسي أنا شاني ندير وعلاه راني هنا وواش هو معنى حياتي؟ يعني عايش بكاليتي جزائرية وبأزمة معنى مواطن دول العالم الأول شغل حاس روحي مديت يدي وخيرت أسوأ الخيارات المتاحة في الحياة، كامل هذا شي لي راني نعيش فيه ماخيرت حتى حاجة .. راكم فاهميني؟
العام لفات و العام لي قبلو، هي غير مسألة وفقط، لأنو هذا ما بقاش عيد ولى إكراه بدني، الأعياد في الثقافات و الأديان تاع العالم تكون مناسبة للفرح و النشاط و التخفيضات و تبادل التبريكات و التقاء الأهل و الأحباب، حنا رجعناه مندبة و موعد تع السلب و العذاب النفسي و الإفلاس المادي و أقود مافيه هي عشريام تسبقو تفوتها مجرجر في السواق و الغبابر و التليفونات، و تغرق وسط إعصار تع الموالين والسماسرية و مالين الكوامن و نهار العيد عندك مدة زمنية تستشعر تلك اللحظة و بعد 3 أيام من ورا العيد تعيش مُقطع الأوصال، مريش و مفلس. و حتى الحانوت لي مولف تكريدي منو و يديبّانيك، مولاه يغلق و يروح يعيّد في بلادو، تبقى منبوذ و معزول غير انت و الفريسة في الثلاجة و حبة بصل مع برج تع قارص في الجانب.