u/HumanBeing104

فنسينت بيفينز هو صحفي أمريكي، إشتغل في صحف زي واشنطون بوست، فاينانشال تايمز، و لوس أنجلوس تايمز. إشتغل كمراسل أجنبي في بلاد زي البرازيل و اندونيسيا.

سنة 2020 نشر بيفينز كتابه "أسلوب جاكرتا: حملة واشنطن المناهضة للشيوعية وبرنامج القتل الجماعي الذي شكّل عالمنا". الكتاب اعتمد على أكثر من مئة مقابلة اجراهم بيفينز في اندونيسيا و دول عالم ثالث أخرى و على وثائق سرية لوكالة الاستخبارت المركزية الأمريكية تم نشرها في 2017 و بيتناول ازاي الولايات المتحدة تبنت بعد الحرب العالمية التانية سياسة خارجية بتتقبل لدرجة ما وجود دول مستقلة خارج الدائرة الأمريكية و السوفييتية (المعنى الأصلي ل "دول عالم ثالث") حتى لو النخبة الحاكمة رفضت تقمعهم بشكل كامل او تبيدهم تماما احقاقا لمبدأ المواطنة و الوحدة الوطنية، بشرط إن الشيوعيين ميوصلوش للحكم. لكن السياسة دي ماستمرتش، و بعد الخسائر إللي تعرضلها الامريكان في الحرب الكوريية، قرر ايزنهاور إنه كان لازم يكون في تحول في الإستراتيجية الأمريكية في الحرب على الشيوعية.

السي أي إيه إتأسست رسميا سنة 1947. و تحت الظروف دي بقيت تلمع كرأس حربة محتمل في الإستراتيجية الجديدة للحرب على الشيوعية. المشكلة، زي ما بيقول بيفينز، إنهم معرفوش يخترقوا الدول الشيوعية بالفعل. بالتالي التحول كان للعمليات في الدول "تحت خطر التحول للشيوعية". أوقات كتير "الخطر" ده كان منفوخ و مبالغ فيه. لكن الحافز للتهويل (او اللوبيينج) ده كان مادي. زي في إيران إللي اتجهت إنها تأمم مواردها من النفط تحت قيادة محمد مصدق، قبليها كان النفط الايراني ملكية فعلية للانجليز و برغم إن مصدق مكنش بأي شكل شيوعي او يساري متطرف، البريطان اقنعوا الامريكان بالتدخل لعزل مصدق سنة 1953. السي أي إيه اعتمدت على شبكة من النخب من الجيش و رجال السياسية و رجال الدين، و اجروا بلطجية عشان يهجموا على المساجد أكنهم شيوعيين، بيفينز بيتكلم عن العملية (إللي سميت "عملية اياكس") بالتفصيل في الكتاب.

في الانقلاب في جواتمالا سنة 1954(فيديو بيتكلم عن الموضوع) اللوبي المرادي كان شركات تصدير الموز. شركات الموز كانت عائق حقيقي للتقدم في دول امريكا الوسطى زي جواتمالا و هندورس، زي الاقطاعيين عندنا في مصر بظبط. بعد الثورة الجواتمالية سنة 1944 و التخلص من الديكتاتورية العسكرية و إنشاء نظام ديمقراطي بيهدف إلى تحويل جواتمالا إلى *دولة رأس مالية حديثة*، في اوائل الخمسينات قرر الرئيس جاكوبو اربينز إنه ينفذ برنامج إصلاح زراعي. الحكومة الجواتمالية هتشتري الاراضي الغير مستخدمة بالسعر المنصوص عليه في الإقرار الضريبي و توزعها على الفلاحين. شركة يونايتد فروتز وقتها كانت بتمتلك اغلب أراضي جواتمالا الزراعية، و مبتستخدمش ٨٠٪ من اراضيها كجزء من استراتيجية احتكارية عشان يقللوا الاسعار. استراتيجية الاصلاح الزراعي كانت في وقتها شيء مستخدم في دول العالم كله و حتى مدعوم من الامريكان إلى درجة كبيرة في دول زي اليبان، مصر، تركيا، كوسيلة لحصر نفوذ للشيوعية عن طريق تفكيك الاقطاعيات الرجعية و تحويل كل فلاح إلى "رجل اعمال صغير" زيها بظبط زي سياسة ملكية البيوت. لكن الاختلاف المرة دي إن يونايتد فروتز (تشكيتا حاليا) كان ليهم علاقات مباشرة بطاقم ايزنهاور في البيت الابيض و اخو الن دالس مدير السي أي إيه وقتها. و رغم إن جواتمالا مكنتش شيوعية، المجتمع الامني في امريكا كان خايف من "تأثير دومينو" يدفع "الشعوب المتخلفة" في امريكة اللاتينية كلها إنها تثور ضد الاحتكارات الأمريكية. بالتالي امريكا حاصرت الدولة الصغيرة و رأيسها بكل الاشكال الممكنة لغايت لما ساب الحكم للقائد العام للقوات المسلحة في حكومته، كارلوس انريكي دياز. بيحكي بيفينز في الفيديو إزاي إنه لما السي اي إيه سلموا كارلوس دياز ورقة باسامي اشتراكيين عشان يغتالهم، دياز رفض رفض قاطع فالامريكان استبدلوه بحد ينفذ أوامرهم. الرسالة كانت واضحة و استمر عليها الامريكان طوال الحرب الباردة، إنت ممكن تبقى مجرم منغير أي قدر يذكر من احترام الذات او الوطنية، لكن طول ما إنت بتقتل الشيوعيين فامريكا بتحبك. الاحداث دي كلها حصلت و كان بيتابعها شخص هتعرفه بعديها بأسم ايرنستو "شي" جيفارا و كانت ركيزة رئيسية في تطور تفكيره و قناعته إن الاصلاح و الديمقراطية الليبرالية مستحيلة في امريكا اللاتينية و هي تحت للقمع الأمريكي. و فنفس الوقت العملية ضد جواتمالا تعتبر أثرت على السي أي إيه بنفس المقدار ة كانت نقطة بداية لعملياتهم إللي يعتبر أثرت بشكل مباشر او غير مباشر على كل دول المنقطة. تأثيرها في المجتمع الدولي و الامم المتحدة مكنش اكتر من الترسيخ لللامبالاة، رغم إن جواتمالا كانت تقدر تثبت إن امريكا بتضربهم بطياران عسكري منغير وجه حق، محدش عمل حاجة.

بيفينز بيحكي إزاي اندونيسيا انتزعت استقلالها بقيادة سوكانرو، المنظر الكاريزمي إللي أتكلم عن "ثلاث قوى وطنية" كانوا ركائز لعملية للتحرر الوطني، القوميين، الاسلاميين، و الماركسيين. الحزب الشيوعي في اندونيسيا وقتها كان ليه وصول بشكل او بأخر ل ٢٠٪ من المجتمع الاندونيسي، كاكبر حزب يساري خارج الدول والشيوعية. الحزب كان بيشارك في الإنتخابات في اندونيسيا و كان سلمي و بينظم برامج ثقافية و تعليمية و مسرح. بعد الانقلاب ضد سوكارنو و سيطرة سوهارتو على الحكم، اندونيسيا هتخش في فترة ابادة، سجن، و إخفاء قسري لمئات و يمكن اكتر من مليون شخص من إللي كان ليهم علاقة بالحزب الشيوعي. اغلبية الناس دي كانوا مواطنيين عاديين جدا، مدرسين او عمال او غيره، و كان رؤيتهم لنفسهم إنهم جزء من القوى الوطنية و كل حلمهم إنهم يشوفوا وطنهم حر مستقل و متقدم و مفيش أي سبب إن الدولة بتاعتهم تأذيهم، بيفينز بيقول إن ده كان سبب من الاسباب إن الضحايا يبقوا بالكمية دي. العالم عرف عن الابادة دي سنة 2012 عن طريق فيلم وثائقي إسمه "فعل القتل" فيه مقابلات مع ناس من الارتكبوا الجرائم دي. تقدر/ي تشوف/ي الفيلم على يوتيوب. البعض وصفه إنه أفضل فيلم وثاقئي في التاريخ.

في البوست الجي بكرا، بعد كل المواضيع دي هحاول اوصل لاستنتاجات عن تكتيكات السي أي إيه و ازاي ممكن تواجهها. الموضوع ده مهم لإن السي أي إيه هي إللي، بشكل او بأخر، بتحط الرتم او الخطة للأجهزة الأمنية في العالم كله، بالتالي معرفتك باساليبهم هي معرفة بأساليب الصهاينة، الاماراتيين، أمن الدولة، الخ.