قطتي طايحة بانها تطلع على جدار البلكونة الي تحته الشارع من فوق دورين ولا اقدر اجيبها لانها بلكونة منظر بس والنافذة تفصل بيننا والمكان خطير مرة وهي غبية لو تشوف زول قطوة لحقتها فكيف من على الجدار، والحمارة تقهر تطلع بدون ما نحس فيها مع ان النافذة بس لحظات بسيطة
اااخ بس
أنا عاطلة ومطفرة جدًا ومديونة…. قبل أشهر قليلة اقترحت فكرة مشروع لأمي لأنها تحب هالأشغال، وسويت حساب تيك توك وصممت اللوقو
والمنتج اللي بنبيعه أقدر أنا أسويه لأني حرفية مثلها، يعني عندي المهارة وهي كذلك... وقلت لها أنا بسوّق بحراج وأنتِ سوقي بتيك، وفعلاً صار فيه طلبات كثيرة من تيك الحمدلله وانشغلت أمي، وأنا على أساس الطلبات اللي تجيني بحراج بسويها، لكن ما جتني طلبات وكان عادي عندي
لكن اللي لاحظته إن أمي صارت الطلبات اللي ما تقدر تسويها تخلي أختي تسويها -مع إنها مشغولة، وما عندها نفس مهاراتي ودقتي بالأعمال اليدوية، وعندها أصلًا مصدر دخل ثاني وما هي محتاجة - ولا تقول لي وقلت مو مشكلة الحمدلله على كل حال، لكن صرت ألمّح لها إن أي طلب ما تقدرين تستقبلينه أنا بسويه
وطوال هالمدة كنت أساعد أمي وأختي بالطلبات بدون مقابل، وكان شغلي يعجبها وتمدحه، مشكلتي إني مهما لمحت لها إن أي طلب ما نقدر نستقبله وقت الضغط أنا أقدر أسويه، تقولي أنا بسويه، لكن بالنهاية ألقاها ترفض الطلب أو تسلك لي وتخلي أختي تسويه حتى وهي منضغطة، والمبلغ يكون لها
المهم، إذا تناقشنا إنهم يقفلون الطلبات بسبب الضغط، أقول دائمًا لا تقفلون وخلوّني أسويها وأنا أوفر المستلزمات، ويتعذرون بالضغط وضيق الوقت وأقول لهم لا، هذا موسمه وأنا مضغوطة من الديون وأحتاج مصدر دخل، ويقولون تم 🤝 لكن تو انتبهت إنهم منزلين بالحساب: “وقفنا استقبال الطلبات”، والصدق إنها غصة بصدري وبكيت شوي
مو سالفة فلوس، لأن أمي ما تقصر علي من الأساس، لكن ما أبغى أكون عالة عليها واخذ منها وحزينة…. مدري كيف أوصف شعوري، بس كنت أحتاج مصدر دخل وهم أكثر ناس يعرفون إني جالسة أعاني ماديًا حاليًا وناقصتني أساسيات، ومع كذا مستبعديني خاصة إن أختي أصلًا ما كان لها طاري بالموضوع، رغم إنها الحين ما هي مقصرة وسوت أشياء كثيرة وتعبت على الموضوع وكذلك امي فهو حقهم ومالهم مالي دخل به بالنهاية جهدهم
لكن أنا بعد قادرة أسوي نفس اللي تسويه، وأنا أصلًا من شجّع فكرة الحساب وسواه لأن أمي كانت رافضة بالبداية… فمدري هي حساسية ولا وش، لكن زعلانة وما ودي أقول لهم وأحسسهم بتأنيب الضمير أو يشفقون علي، ومع ذلك فيه أمور ناقصتني وبستفيد من أي مبلغ
الموضوع محرج ويفشل ماودي اكون في موضع اني اغبط اهلي على رزقهم الله يبارك لهم ويزيدهم بس عاد هذا احساسي شسوي بعد
افكر ليش مافيه صبات زي study with me بس للانجازات عامة انزل فيها انجازاتي اليومية ويصفقون لي الغرباء؟