يا جماعة وسعوا السكة لملوك الجمباز الفكري والتأليف الدلالي في التاريخ النهاردة هنتكلم عن ازاي علم الاجنة الحديث بيتم تدميره وسحله على عتبة السبوبة الاعجازية عشان خاطر عيون ترقيعة من كيس المفسر المعاصر !!

الموضوع وما فيه ان كاتب النص زمان فتح كتالوج الطب اللي كان مكسر الدنيا في العصر ده وهو كتابات الراجل البركة الطبيب الاغريقي الشهير (جالينوس) الراجل ده عاش في القرن الثاني الميلادي يعني ولد سنة 129 ميلادي ومات سنة 216 ميلادي وعشان تتخيلوا المسافة الزمنية فالراجل ده كتب أبحاثه ونشرها قبل ظهور الاسلام ب 420 سنة كاملة !! يعني اكتر من اربعة قرون كاملة كانت كتبه متقشرة ومترجمة ومستقرة في مدارس الطب في الشرق الاوسط لدرجة انها بقت ثقافة شعبية عند اطباء العرب وقتها (جالينوس) ده قسّم تطور الجنين لاربع مراحل بالعين المجردة ولانه بيبص بالعين المجردة على سقط الاجنة وقع في الفخ الشهير وافتكر ان العيل في بطن امه بيتبني زي خيمة الفرح نوقف
العواميد والحديد الاول وبعدين نفرش فوقها السجاد واللحاف وطبعا الكلام ده نقل في النص بالحرف: {فَخَلَقْنَا الْمُضْغَةَ عِظَامًا فَكَسَوْنَا الْعِظَامَ لَحْمًا}

لما العلم الحديث اخترع الميكروسكوب واكتشف ان العظام والعضلات بيتولدوا مع بعض في نفس السنتيمتر ونفس الفيمتو ثانية ومن نفس الخلايا الجذعية بالتزامن المطلق دكاترة الترقيع جالهم شلل ايديولوجي بس هل استسلموا لأ طبعا!! طلعوا لنا الترقيعات الثلاثة العظمى تعالوا هنشرح السيرك ده وكاننا بنشرح لطفل صغنن صُئنن:

🤸‍♂️ الترقيعة الاولى تحت عنوان: اللحم كان مستخبي تحت السرير وبيلعب استغماية !!

الهبدة: بصوا يا جماعة الاية بتقول فكسونا العظام لحما و مش فخلقنا العظام لحما ده معناه ايه معناه ان اللحم كان مخلوق وموجود وجاهز في حتة تانية في الرحم و الاية بتتكلم بس عن خطوة الكسوة والتغطية

حقيقة مررة بمرار الطين: يا حلاوة يعني اللحم كان قاعد في بطن الام بيشرب شاي بالياسمين ومستني العظام لما تخلص عشان يقوم يلبسها زي الجاكتة لغويا فاء التعقيب والترتيب الصارم بتجيب التبرير ده الارض وتثبت التتابع الزمني الاجباري والمضحك ان كل مفسرين السلف الصالح قالوا بالحرف ينبت الله اللحم بعد ان يستقر العظم يعني
المرقع المعاصر بيطلع شيوخ السلف مبيفهموش عربي وبيمسح بكرامتهم البلاغية الارض عشان بس يلحق المركب اللي بتغرق

🤸‍♂️ الترقيعة الثانية السحرية: سحر جعلت الفجل تفاحا او حجة الغضاريف الماكرة !!

الهبدة: الطب الحديث بيقول ان الجنين في الاسبوع السادس بيتكون فيه هيكل غضروفي قبل العضلات والغضروف ده هو اصل العظم اذن الترتيب سليم القران صح

مسخرة السنين والايام: مبروك يا dكتور انت كده زي اللي جاب فجلة وقال للناس بصوا دي تفاحة بس خضرا وطويلة وطعمها حادق طبيا يا دكتور الغضروف (Cartilage) مش عظام (Bones) دي انسجة تانية خالص والادهى بقى اللي بيموت من الضحك ان خلايا العضلات البدائية (Myoblasts) وخلايا الغضروف بيطلعوا مع بعض بالتزامن التام من طبقة خلية واحدة اسمها الورقة الوسطى (Mesoderm) مفيش دقيقة واحدة في تاريخ الرحم البشري بيكون فيها الجنين عبارة عن هيكل عظمي شبحي عريان معلق في الهوا وبعدين اللحم يجي ينزل عليه هبوط مظلي التطور نسيجي متداخل خيط بخيط يا دكاترة يا بتوع المدارس وبلاش استهبال على عقول البشر

🤸‍♂️ الترقيعة الثالثة: معجزة النمو المقلوب اوتوماتيكيا !!

الهبدة: الترتيب في الاية يقصد سبق الانتهاء لا سبق الابتداء يعني العظام بتخلص تمايز وتأخد شكلها النهائي قبل ما اللحم يخلص نمو فوقها

كوميديا سودا بطعم الهبد الخام: هنا بقى بنوصل لقمة الضحك الهستيري العضلات الهيكلية بتبدأ تتحرك فعليا وتلتحم بالاوتار في الاسبوع الثامن في حين ان عملية التعظم الحقيقي (Ossification) هي اخر حاجة بتخلص في جسم البني ادم العظام بتفضل طرية وغضروفية لشهور وفيه عظام في الجمجمة والحوض مابتخلصش ومابتلتحمش الا في سن العشرين بعد البلوغ فإزاي بتقول العظام انتهت الاول هو الجنين بيتولد بهيكل عظمي بتاع راجل عجوز وعضلات طفل الصراحة دي محتاجة غرزة فوق جفن المنطق عشان تفوق

من الاخر كدة ومن ورا مصنع الكراسي:
الموضوع كله ان كاتب النص لقط كتالوج (جالينوس) الطبي بتاع زمان وخلاص ولما جالينوس كان بيبص بالعين المجردة على الجنين المجهض ويشوف أطراف بيضاء كان بيتهيأله انها عظام سبقت اللحم !! الفكرة مش ان الأقدمين جهلة الفكرة في المرقعين بتوع النهاردة اللي عايزين يثبتوا بالعافية ان الفخ البصري بتاع الطبيب الإغريقي هو إعجاز فضائي نازل من فوق السحاب !!