El tounsi wel sfar (Traveling and exploring)
ما نحبش نطوّل ياسر و ان شاء الله توصل الفكرة، انا تونسي مالصغرة يتحرك ياسر خدمت ب500 دينار في معمل و مشيت لاخر الدنيا نلوج عالخدم بعيد على دارنا و تحملت الضلم و الجوع و لي يتخيلو راسك الكل. للي سهل ربي و هجيت و حاليا نخدم فالطيران في دولة اخرى. في المجال لي نخدم فيه كل يوم نشوف في ناس تهز حوايجها و تهج لبلدان اخرى تلوج على فرص احسن بش يعيش عيشة باهية. هنود على باكستان على مغاربة على فرانسيس على انغليز. البشر الكل فاهم الي الحفرة لي تولدت فيها اذا ما عادش توكلك الخبز توكل على ربي و امشي لبعيد جرب حظك. كان شعب واحد بهيم والف بالنوم و البكاء يستنى في شكون يشدو من يدو و يقلو امشي غادي تو تلقى مستقبل احسن. شعبنا العزيز التونسي. التونسي بالنسبة ليه العالم فيه كان الغرب ،اوروبا هي النجاح هي الفلوس هي الفرحه هي كل شيء، يعشق شدان صف و تمرميد و يوصلو حتى يزغرطولو كيف ياخذ فيزا. يوصل يخاطر بحياتو و يقبل فكرة الموت و النوم تحت القناطر بش يشم هواء اوروبا، موش عارف لي باسبورو يهزو ل 36 دولة منغير فيزا و تمرميد معزز مكرم. فيهم نسبة كبيرة متاع بلدان متطورة و فيها العيشة الكريمة، ينجم يخدم فيها و يكون روحو و يبني حياتو من جديد. اول مرة مشيت لجنوب افريقيا كليت صدمة، من كثرة ما حبيتها عديت اربعه سوايع ندور في كايب تاون مفديتش، حبيت نستقر فيها، الناس الكل تخدم الشوارع نظيفة طقس مزيان الدنيا رخيصة، جزيرة الموريس قطعه مالجنة.. شعبها فرحان شايخ عالبحر و الطبيعه و يحكي فرنسية. زوز بلدان هاذوما بيناتك انتي وياهم تيكي طيارة و حجز نزل يقولولك مرحبا بيك يا تونسي عندك الحق تقعد معانا 3 اشهرة منغير فيزا. اسيا طايرة بالعالم الكل قعدت 6 ايام في اندونيسا مخي رتاح و معاش نحب نروّح. 100 دينار تونسية قادر تعيش بيها 3 ايام. حجز نزل ما يتكلفش 300 دينار، مشيت لتركيا نشوف في الدزيرية و المغاربة تخدم على رواحها و تحكي تركي و التوانسة مفماش. مشكلتك فلوس؟ تي هاكم تحطو 300 و 400 دينار في سهرية متاع شراب، هاكم تصرفو و كل ما نروّح نشوف تونس كاملة فيدها ايفون وانا مزلت ندور بتاليفون مالعصر الحجري. ياخي خايفين منو المطار؟ ياخي تخافو مالسفر؟ ياخي تخاف تدخل ل اجونس دو فوياج تسأل قداه التسكرة للبرازيل؟ برا اهمل في اخر الدنيا حل عينك عبي مخك فماش ما تدبر خدمة ولا ترجع مرة اخرى محضّر روحك و تكبّش تفك بلاصتك. متعرفش تبزنس ؟ ما تعرفش تقول كلام حلو؟ نقص مالبكاء هاو الماء هاو الضو... كان عمرك فات العشرين وقيّت تصنع طريقك لا قيس سعيد لا مجلس النواب بش يوكلك ولا يشوفلك حل. اصنع طريقك بيدك. تحب تخرج.. اصنع طريقك وحدك.