u/Mysterious-Cup-1948

وين نقدر نراجع دكاتره نفسيين بشكل مستمر ومتابعه بدون ماتخلص فلوسنا

انا ام جديده وكان حمل بدون تخطيط، فتره الحمل كانت جداً سيئه بالنسبه لي من جميع النواحي ٩ شهور وانا كارهه نفسي والوضع كل شي كان مقرف وغير مريح حتى حركه البيبي كانت تزعجني وكنت اتذكر الامهات اللي يقولون لما يتحرك البيبي نحس بعصافير ومادري ايش وانا كان غير مريح بالنسبه لي وكان عندي قلق موطبيعي كل شوي اشيك على النبض بجهار منزلي كنت احس اني محبوسه بجسمي ولا كنت اقدر اطلع ولا اجي ووزني زاد ونفسيتي بالحضيض وقتها كانت الظروف اللي حولي مو افضل شيء.

وقت الولاده اسوء واسوء وانا طول عمري اخاف من هذا الموضوع وكان جدا يوم سيء بالنسبه لي

اول ماجابو لي البيبي ماقدرت اتقبله، واغلب الوقت مع النيرس

يوم رحت البيت اول ٣ شهور كانني روبوت ماحس ولا فيه مشاعر بس انام اقوم اشرب البيبي حليب اغير له اخلص شغلي مع البيبي انام وارجع نفس الروتين كلكم ساعه بدون مشاعر كاني روبوت حتى اكل ما اكل احس ماعندي وقت مع ان الحين بعد ماكمل سنه احس الان المفروض ماعندي وقت اكثر كيف كان الوقت ضيق هذيك الفتره مادري! وكنت ما اكن مشاعر للطفل ابدا ماحسيت اني احبه حسيت ان هذا مسؤليه ولازم اهتم فيه بعدها فصلت وقلت لزوجي خلاص ماقدر لازم تساعدني وفعلا بدا يساعدني كثير

وبعد فتره ٣ شهور بدت ترجع مشاعري واستوعب وبديت احبه بس تجيني مرات افصل افصل بشده لدرجه ماقدر اهتم فيه يعني اخلي ابوه يمشي اليوم معاه، اناااام ساعات طويله انام اقوم متاخر واقعد معاهم ساعتين ٣ ماتحمل وخلاص ينتهي دوري احس بثقل موطبيعييي من المسؤوليه واتهرب من طفلي! وبعدين اقعد افكر اخر الليل واصيح والوم نفسي وعاتب نفسي والله اني اجاهد نفسي اجاهد عشان اصير افضل، واذا صحيت لازم البيت نظيف يلق لق لازم كل شي مكانه وكل شي مرتب ولا ماقدر اقابله لازم المواعين نظيفه الملابس نظيفه ومرتبه مافي اشغال ثانيه في راسي لازم تخلص عشان اقعد معه واهتم فيه

تعبت جدا من نفسي احس اني دائما مرهقه وانا اتهرب واتهرب وكله احس بتعب جسدي ثقيل ونفسي ثقيله والله اني الان اموت عليه واحبه بس مادري ليش يصير معاي كذا تحي ايام خفيفه زي العسل وايام اذا فيه اشياء مامشت زي مابي البيت معفوس مانمت عدل او شي مضايقني ماقدر اهتم فيه احس بثقل واتهرب

ابوه جداً متعاون هو يهتم ١٠٠٪؜ فيه وانا في هذه الحاله وهذه الحاله تكون معاي ٥ ايام من اصل ٧ ايام.. تعبت من التفكير وانا فعليا مادري ليه قاعد يصير معاي كذا كل شي يزعجني ياثر علي كانه نهايه العالم..

قدمت على عامله لعل وعسى شوي يتغير الوضع ممكن اذا اعرف ان مايحتاج اركز على البيت كثير وفيه احد ينظف ويسوي واذا بطلع فيه مساعده يختلف الوضع؟ افيدوني.. هل انا ام سيئه او ان الامومه مو لي؟

هذا الموضوع اثر علي وعلى علاقتي مع زوجي مع انه اب مثالي لكن كرهته واحس انهم عائق في حياتي.. واحياناً اندم على كلامي هذا واقول ماتخيل حياتي من دونهم