كيف اتعامل مع الإستنزاف ووقاحة الأسلوب بمسمى "المساعدة" بدون ما أتحارب؟
عندي مشكلة مستنزفتني نفسيًا وأحتاج آراءكم..
أختي الكبيرة عندها طفلين واحد بالابتدائي كبير والثانية نونو عمرها سنة ونص
والمشكلة هنا مو بالزيارة المشكلة انها تحس كل ويكند لازم تجينا "أجازة" (تريح فيها) ويعني ما اكذب عليكم اختي هذي طلعاتها وااااااجد حتى لو هي فاضيه بتدبر مكان تبغى تروح له اهم شي ما تقعد بالبيت
ويعني لما تجي هي وبنتها البيت يصير في حالة فوضى وحده تغير حفاظة بنتها ووحده تسوي لها اكل ووحده تنومها يعني النظام ذا بتحسونه مساعدة وعادي صح؟ جوابي لكم هو لا..
صار الموضوع كأنه واجب واتهزأ اذا ما مسكت بنتها واهتميت فيها كأنها وحده من الأشياء اللي لازم اسويها وانا والله اساعدهم من طيب خاطر وكل شي واسوي اللي اقدر عليه لكن الموضوع استنزفني! كيف انهم محسسيني انها بنتهم مو بنت اختهم
يعني كل ويكند اقعد بالبيت بدل ما اروق زي الناس ولا اشوف مسلسل اقابل هذي النونو ويخاصموني اذا ما اعتنيت فيها..
يعني مثلًا الأن اختي سافرت مع زوجها، وعيالها ببيتنا احنا وطبعا احنا بنهتم بكل شي لدرجة سمعت امي تقول رتبوا بينكم مين يمسك الاطفال.. وهالشي مو اول مره يصير دايما دايما يصير كذا
والمصيبة امي واختي محسسيني اني انانية وما اساعد بس عشان لما يجون انا استرخي بغرفتي بالويكند محسسيني الاطفال ذول عيالي انا
الموضوع صار ثقيل ومزعج ويضايق وصرت اكره اسمع انهم بيجون واحس ضيم عشان الازعاج وعشان اعرف بتنعاد نفس السالفه وش اسوي وكيف اوقف الموضوع ذا عن حده؟ لأن من اللي واضح لي محد منزعج بالبيت من هالتصرفات غيري انا وامي (لكن امي كليا مقتنعة ان اللي تسويه هي من فكرة مساعدة وأختكم تساندونها عادية) المساعدة عادية لما تكون بحدود لكن فكرة انها تسافر وترمي عيالها وتروح؟ هالشي قاعد يسبب بيني وبين اهلي مشاكل
اتركوا كل هذا الحين.. امس صحيت من الظهر على جية اختي وعيالها بتحطهم عندنا وبتروح البحرين ومن يوم جابتهم وراحت وانا معاها سويت لها اكل ورتبت الصاله والمطبخ وغسلت المواعين وبخرت ولما رجعت اختي من الدوام رحت غرفتي انا
وبالليل اختي الثانيه (مو نفسها اللي كانت بالدوام) جت كالعادة بأوصخ اسلوب تأمرني اطلع من غرفتي اجلس بالصاله عند بنت اختي "اساعدها" مع انه هي بنفسها ما تسوي شي اذا انا مسكتها والاسبوع اللي فات اصلا مسكتها وهم طلعوا "بس عشان انا طلعت مع صاحبتي قبلها بيوم وحتى هم يبغون ينبسطون زيي" عاد اقسم بالله هذا كلامهم! المهم لما طلبت مني هي باسلوب وصخ اطلع الصاله انتبه لها انا رفضت وعاندت اطلع وهي عاندت تطلع من غرفتي وتركتها وطلعت هي بنفسها بعدها بشوي
طبعًا اليوم اللي بعد هذي المشكلة اللي هو اليوم صحتني اختي تشد شعري وتضربني "عشان نومي ثقيل" على قولتها بأوصخ طريقة برضو عشان انام جنب بنت اختي.. هي لما استمرت تضربني وتشد شعري بالطريقة ذي ضربت يدها وهي سوت انها انصدمت واني سويت شي عنيف
اللي ماتعرفونه ان اختي ذي والثانية يتحزبون ويفزعون لبعض ف زي ماتوقعت الثانية اللي هي اولردي طالعه للدوام كلمتها اختي اللي كانت تضربني بتهاوشني ودقت تصرخ زي المجنونه تقول كلام زي للحين ما حاسبتك على امس (قصدها اني رفضت اطلع من غرفتي) وهل تسمين حركاتك هذي اخوه..؟
انا انصرعت من الكلمة ذي ! اجل هم يسمون حركاتهم اخوه؟؟؟
مقدر احارب فكرة ان اختي ترمي عيالها وتروح لان كل شي بينقلب ضدي كيف اتعامل مع الموضوع ووش اقول اذا جت اختي من الدوام حاسبتني على قولتها؟