البنات في بيئة العمل و التدريب
سؤال جد براودني من أول ما بدأت العمل في الأردن.
القطاع الي بشتغل فيه، يوجد عنا متدربين بشكل دائم، سواء متدربين جامعات او غيره. الغالبية العظمى من المتدربين إناث، رغم انه غالبية الموظفين في القسم الي كنت أشتغل فيه بالذات ذكور.
الظاهرة الي لاحظتها، او الظواهر، كانت انه العديد من الموظفين المقرر انهم يدربو البنات، إما ما بدربوهم و بعطوهم مهام همي مستثقلين منها او مهام تافهة و ما بقوم بالتدريب أساسا، او بكون تدريبه رفع عتب و ما بقوم بواجبه باكمل وجه.
المشكلة انه مبرراتهم لهذا التصرف انهم بنات، يعني شو رح يشتغلو و تدريبهم عالفاضي و اصلا بفهموش، رغم اني شخصيا دربت طالبات متفوقات ما شاء الله عليهم!
و الادهى و الأمر في العديد من المدربين بحطم مجاديف البنات فعلا، بصير يحكيلها شو بدك بهالشغلة، اتزوجي أحسنلك، اصلا ما بزبطلكوا هالشغل، اصلا صعب و من هذه الحجج، رغم انو فعلا في منهم بفهموا أحسن منهم.
بعض المتدربات طلبو يتدربوا معي بسبب هذه الظاهرة، و إشتكوا من التجريح و تكسير المجاديف، و كانوا جدا فرحانين انه في حد بشرح و بدرب و بالعكس كنت أشجعهم.
السؤال انه ليش؟ ليش الشباب بشوف البنت عدم المؤاخذة و على ألسنة العديد منزملائي حمارات، ليش بشوفوهم غير قادرات؟ ليش بشوف انه هو فقط لأنه شب بقدر على هذا الشغل؟ رغم انه في كثيربنات مبدعات بالمجال، و علما انه أغلبية المتخرجين بهذا التخصص بنات اصلا!
ليش تحطم أمال الناس و تكسر مجاديفهم؟ ليش ما تأدي أمانتك بنشر العلم؟
هل هاي الظاهرة منتشرة؟ هل برضو في باقي القطاعات هيك؟
بصراحة كثير شباب سقطت من عيني! و لما أدرب بحكولي شوووو بتزبط وضعك قاعد؟ بس عشانها بنت يعني؟ و كل وحدة بدربها نفس القصة، و اذا شب بتسمعش خبر.
هل ضروري اكون عندي فكر زاحف او تزبيط عشان ادرب و أعطي صدقة العلم الي هي نشره؟
ليش الناس ما بتحب الخير لبعضها؟ ليش ما تفرح لما تدرب حدا و تشوفه يشكرك و ينجح بحياته؟ سواء بنت او شب.
ليش نظرت بعض الشباب فعلا طلعت مقرفة للبنات؟