هل فعلاً الهجوم على بنات الطبقة المتوسطة أو الشعبية سببه غيرة ومقارنة ولا موضوع أخلاقي؟
في ظاهرة مجتمعية بجد تستحق الدراسة إن المجتمع بيحط قواعد سلوكية مختلفة حسب الطبقة الاجتماعية
يعني مثلاً لو بنت من طبقة شعبية اشتغلت على السوشيال ميديا وبدأت تسافر وتروح وتيجي ويبقى ليها صحاب بنات وولاد وتخرج معاهم وتلبس بطريقة معينة بيبدأوا يهاجموها مهاجمة شديدة جداً مع العلم إن بنت من طبقة تانية ممكن تكون من طبقة غنية بتعمل نفس التصرفات اللي بتعملها البنت اللي من طبقة شعبية بس مش بيحصل عليها الهجوم ده
ليه بقى لأن هم بيشوفوا إن البنت اللي من طبقة شعبية دي واحدة منهم زي بناتهم شبههم فهم بدل ما بيصارحوا نفسهم بأحاسيسهم الداخلية الحقيقية اللي هو إيه أنا غيرانة منها أنا بحقد عليها لا لا لا يقوموا يحطوا كود أخلاقي
إن هي غلطانة وهي إزاي تعمل كده وهي بقت بنت مش كويسة وينظروا عليها لأن دايماً الإنسان في العادي بيقارن نفسه بالناس اللي قريبين منه في الثقافة وفي المكانة الاجتماعية فالموضوع كله هو غيرة ومقارنة اجتماعية