حقيقة تخصص هندسة الذكاء الاصطناعي والانسان الالي بالجامعات العراقية
من خلال بحثي بالتخصصات اللي انفتحت اخر سنتين بالجامعات العراقية عرفت انه اكثر من معظمهن عبارة عن تخصص مغلف بطريقة تسويقية بتخصص اخر
مثلا اكو قسم موجود بجامعة النهرين والجامعة العراقية وجامعة الكرخ وبعض الجامعات الاهلية اسمه: هندسة الذكاء الاصطناعي والانسان الالي
من جامعة النهرين والكرخ وشكم جامعة اهلية نزلوا منهج هذا التخصص (اللي هو متشابه عند الكل لان بينهم توأمة) لاحظت شي انه هو مو تخصص جديد انما امتداد لتخصص قديم موجود بجامعة بغداد من التسعينات ربما الا وهو هندسة الميكاترونكس بعد ماقارنت بين المنهجين شفت انه نسبة جبيرة كلش من المنهج متطابق نفس المواد ونفس الوحدات ونفس كلشي بس اللهم حاطين مواد ماشين ليرننك وديب ليرننك (موجودات بالميكاترونكس مال بغداد) وكومبيوتر فيشن وNLP وشكم مادة رياضيات تستفاد منها بالذكاء الاصطناعي(حتى يستوفي اسم ذكاء اصطناعي ببداية الاسم)
بس الجامعات حتى يركبون الترند فتحوا قسم ميكاترونكس وحتى الطلاب تقبل عليه غلفوا اسم الميكاترونكس بهذا الاسم الرنان حتى الطلاب اصحاب المعدلات العالية تدخل وفعلا خطتهم نجحت هذا القسم يقبل بجامعة النهرين 96 وبالجامعة العراقية 93 تقريبا(غير الاقسام اللي بالجامعة التكنولوجية بعضها اقتربت من ال95)
بينما الميكاترونكس بجامعة بغداد يقبل اقل من 92(مو لان الطلاب تقبل عليه لان عدد مقاعدة قليلة فياخذ الاعلى) شوفوا التسويق والتغليف شلون يأثر على اختيارات الطلاب!!!
اني جنت ماخذ نظرة عن هاي الاقسام انها تعبانه ومامبنية على اساس صحيح بس هل هي فعلا هيج؟
بالحقيقة لا هاي التخصصات مبنية على اساس علمي صحيح (اللي هو الميكاترونكس وهو تخصص راسخ)
رح تاخذ بيها مواد تجمع بين شويه من الميكانيك والالكترونيك وهواي من المواد البرمجية والرياضيات والذكاء الاصطناعي
الاساس صحيح الريفرنس للمواد مضبوط التنظيم مال المواد مو كلش صحيح يعني مثلا الOOP مشمور بالسمستر الخامس وهو المفروض ينوخذ باول سنة مو بالسنة الثالثة.... بس اللي لازم يتطبق صحيح هو المختبرات والورش او المعامل والاساتذة الاكفاء هل عدنه منهم؟لا
يعني بصورة عامة هيج تخصص يعتبر زين للشخص الفاهم هو وين رايح ووين طاب وهو قسم مشتت لان الميكاترونكس مشتت لازم من اول يوم تدخل لهذا التخصص اذا تريده تعرف بشنو تريد تتخصص برمجة؟ روبوتات؟ ذكاء اصطناعي؟ رؤية حاسوبية؟....الخ وعلى اساسة تشتغل خلال دراستك وتكدر اتوقع تدمج مجالين اذا توفرت ظروف افضل
يعني بصورة عامة الوزارة تعرف شلون توجه عقول الشباب بالمكان اللي تريده هي وبالشكل اللي هي ترسمة اليوم وجهت الاف لتخصص مو مستحدث فقط مغلف الله اعلم شلون تكدر تسيطر على هاي الفئة المهمة اكثر!
مادري اذا كلامي جان هوسة او مو منظم بس صراحة اني حاولت انظم افكاري بهذا المقال البسيط تناولت هواي نقاط متداخلة ربما تشوفون بعضها تافهة بس هي مهمة لان اختيار التخصص الجامعي مو شي بسيط ولازم الطلاب تعرف تبحث وتسأل وتقارن حتى تعرف شنو يناسبها
شكرا