r/IraqiStudents

بالمرحلة الثالثة نختار تخصص بالكلية، اني اخترت التخصص الي جاي للكلية علموده، داومت اول يوم والكة 9 بنات وياي وولد واحد (يب قسمنا بيه طلاب قليلين)، وهذا الولد سختجي ويغيب هواي.

المشكلة اني انسان خجول كلش، اوكي اكدر احجي واسولف وياهم وكلش طبيعي والبنات مو معقدات، بالعكس فرفوشات، وعلاقتي زينة وية بعضهم. بس المشكلة ما راح اكدر ابقى كاعد بالقاعة بالريستات (عدنا قاعة ثابتة)، لان تدرون بالنظرة عن الي يكعد بمكان كلها بنات... ولازم ابقى افرفر بالممرات بكل ريست او بكل محاضرة ملغية

شلون راح اكضي هالمرحلتين؟ الشغلة مزعجة كلش لان متعود ابقى بالقاعة ونسولف اني والموجودين وكتها جنا ولد وبنات

شلون تشوفون هالشغلة؟ شنو نظرتكم الها؟ شنو رأيكم؟

هو الموضوع بيخص اختي، اختي ناوية تكمل دراستها لكنها رسبت بالرابع اعدادي، واحنه ما عدنا وحدة ترسب اهلي جداً متشددين، فكانو ناويين يدخلوها معهد، وبحسب معدلها بالثالث فهو 56 وحرفياً اجو خيروها يا معهد تجارة او فنون، بس هي هاي مو رغبتها هي تريد تكمل هندسة، وكلام كثير.

فحالياً صفى الوضع انها بتعيد سنة وتكمل بس اذا رسبت بتروح معهد.

أنا الصراحة مو هالكد افهم بالمعاهد، يعني الي يطلع من الثالث يروح معهد مهني فد تخصص معين 3 سنوات وبعدين سنتين معهد؟

انزين يقدر يدرس كلية وراها او لا؟

وشنو التخصصات الزينة كمعاهد يعني شي يضمن ألها مستقبل.

وهل معدل 56 يقبلها قسم زين بهالوكت؟

وللعلم أحنه ساكنين بالبصرة ف المعاهد جداً قليلة عدنا.

اتمنى محد يبخل بالمعلومات رجاءاً، واذا اكو خطة زينة تقدر تسويها يعني احتياط اذا رسبت يا ريت تشاركوها لأن الوضع جداً متوتر بالبيت وما اعرف شلون أعالجه.

اني ماعندي معلومات عن الجامعه وشلون نداوم ولا عندي احد بالكلية وينصحني ويفهمني

فعندي كم سؤال ممكن تجاوبون

من نداوم هم نجيب جنطة نحط بيها الملازم والدفاتر؟ لان شو جاي اشوف الطلاب مياخذون جنط وين يحطون غراضهم اقلام ودفاتر وكذا؟

والملابس يقبلون نلبس اي شي واي لون لو ملابس محدده ؟؟

واول يوم نداوم شلون نندل قسمنا وين؟​ و لاحظت المسافه بعيده بين الاقسام معقوله نمشي المسافه كلها حتى نوصل لقسمنا؟

وشكم ساعه نداوم ومنشوكت لشوكت؟

وكم محاضرة باليوم وشكد تطول؟

بالمناسبة اني يجوز انقبل هندسة اتصالات جامعة بغداد

وخايف من هاي السالفة وما مستعد الها نفسياً الصراحة وكاتلني التفكير اريد واحد يطمني ( مو بس سنة وحدة وانقل وانما طول فترة الجامعة )

ما ادري ساعة احسها ونسة ساعة احسها صعبة مدري انطونا تجاربكم

اكو نقطتين قليل ناس يتكلمون بيهن بس صارلي فوك السنتين افكر بيهن واضوج شوية بسبب عدم تواجدهن بالعراق

الاولى عدد اسابيع الكورس، بالعراق اسابيع المحاضرات 15 واكو جامعات تنطي اسبوع عطلة قبل الامتحانات النهائية واكو بشكل مباشر والامتحانات تتوزع على اسبوعين الى 3 ومرات شهر اذا صارت عطل يعني بالمحصلة اسابيع الدوام تقريبا 17-19 واسبوع عطلة يعني 17-18 اسبوع

عدد الاسابيع هذا جدا طويل مقارنة بغير دول، مثلا امريكا واوروبا الاسابيع تقريبا فقط 10-13 واكو اسبوع عطلة بنص الكورس واسبوع عطلة قبل الامتحانات ويخلص الكورس مالهم بدون تضييع وقت للطالب، المفروض هالنموذج يتكرر عندنا ويتركون الحرية للجامعات يحددون وقت الدوام حسب القسم او يتركونها 15 اسبوع لكن يزيدون المواد ويخلون سنوات الدراسة 3 فقط بدل 4

والموضوع الثاني هو التعليم الالكتروني: اكو مواد ما تحتاج تعليم حضوري مثل مادة الجرائم وحقوق الانسان وبعض المواد الجانبية المفروضة علينا مثل العربي والانكليزي والحاسوب والله يعلم كم مادة راح يفرضون علينا مستقبلا وغيرهن اكو مواد بالتخصصات هم يعتبرون سهلات، المفروض يقللون ايام الدوام ويخلونها للمواد المهمة والي تحتاج نقاش واسئلة ويا الاستاذ والمواد السهلة يخلونها الكتروني فقط الكويزات والامتحانات حضوري