الطب النفسي في بغداد
هذا هو اكثر موضوع حساس بصراحه واول مره قبل ما انشر بوست اكعد اكتب ملاحظات ونقاط اساسيه يجب انو اذكرها ، هذا الموضوع ما اعرف اذا راح ينتهي ب بوست واحد او يكون سلسلة بوستات بس اني انسانه احب اكمل شغلي على اتم وجه ف اعتقد راح اسويه سلسلة وابقى احجي وافتحلكم المجال انو تحجون ونتناقش ، ليكدام الموضوع كلش طويل
اذكركم انو الكم الحق تشككون بكلشي اني داكوله وتروحون تتأكدون منه ، عن نفسي اني اتأكدت من معلوماتي وسويت ابحاثي وجيت دا انقل الكم ، اذا لكيتوا اي خطأ بكلامي ف جيبوا دليلكم وتعالوا وحكون اكثر من سعيده انو اناقشكم بس لازم ننتبه ل كم شغله
لحد يجيبلي ادله من جات جي بي تي لان كلامي نابع من ابحاثي + اسلوبي وطريقتي بالربط ف ماراح تلكى كلامي ب اي موقع ذكاء اصطناعي
اذا تريد تناقشني ف ناقشني لمن تلكى خطأ بكلامي او تحب نناقش الموضوع ومهتم بي ، غير هالسببين لتناقشني ، يعني مو بس تريد تثبتني غلط وتقولني ما لم اقول
هاي مو محاوله لغسل عقولكم اني بس دا انقل الي درسته وانتوا الكم كامل الحق انو تشككون وممجبورين تأيدون كلامي
هسه بعد هاي المقدمه اعتقد نكدر نبلش بالموضوع ..
الطب النفسي في بغداد خصيصاً ، لان اني ولدت ب بغداد والي الحق انو احجي بيها ومالي حق احجي عن الطب النفسي بباقي المحافظات كوني لم اسكن فيها او ازورها زياره ملمه بكل الجوانب ..
بالبدايه احنا لازم نعرف ليش انوجد الطب النفسي؟
الطب النفسي هو حل ل مشكله ، ومثل ما نعرف كل مشكله لازم يكون الها حل ، زين شنو هي المشكله؟
بس دقيقه قبل لنحجي بالمشكله خل نفتهم شنو وظيفة الطبيب النفسي ، وظيفته بكل بساطه انو يفرق بين الشخص المريض فعلياً والشخص الي يدعي المرض او الشخص الي ميعاني من اي امراض نفسيه
وهسه نرجع للمشكله ، الامراض النفسيه هي المشكله ، بس الامراض النفسيه هي مو شي مادي وملموس واصلاً مو فيزيائي يعني اليوم اذا شخص اتوفى واجه دكتور ديشرح جثته .. ماراح يلكى بصف البنكرياس اكو شويه اكتئاب ، كونها امراض نفسيه ف هي ب نفس الانسان وذاته او روحه ، وموضوع الروح وهل موجوده لولا هذا موضوع طويل نتطرقله بعدين لان احتاج ادرس عنه اكثر ، بحسب البحث الي نزله دكتور ديڤد روزنهام ، طبيب نفسي
قرر يسوي تجربه انو يروح هو وجماعته الدكاتره ل اكثر من مصحه نفسيه او مستشفى امراض نفسيه ب اكثر من ولايه ويتمارضون ( يسوون نفسهم مرضى نفسيين ) ويشوفون اذا الاطباء الموجودين هناك يكشفوهم او لا ، وكالوا للاطباء انو احنا دنشوف شغلات غريبه ودنسمع اصوات و طبعاً الاطباء مكشفوا كذبتهم وبالعكس شخصوهم ب شيزوفرينيا
ومو بس يشخصوهم لا همين وصلت بيهم انو يحبسوهم بالمصحه لحد ما يكملون الخطه العلاجيه ، وطبعاً الدكاتره مجانوا ياخذون الادويه لان بكل بساطه همه ميعانون من اي مرض
وبعد فتره يروحون للاطباء ويكلولهم نحس نفسنا صرنا زينين وامورنا طيبه ونحس نفسنا جاهزين نطلع من المصحه ، الاطباء رفضوا يطلعوهم وكلولهم لا والله بعدكم مرضى هسه شويه ونطلعكم ، جبروهم يكعدون شهرين ، وطبعاً راحوا لاكثر من مسشتفى وكل المستشفيات جانت تشخصهم بنفس المرض "شيزوفرينيا" وشوية امراض نفسيه لخ
ورا ماخلصوا هاي التجربه راحوا نشروها بمجلة science بعنوان being sane in insane places وصارت ضجه كبيره عالموضوع ، و وحده من هاي المستشفيات صارت انسكيور وقررت تاخذ الموضوع بشكل شخصي واتحدت الدكتور انو يدز ناس متمارضين ويكشفوهم ، الدكتور قبل التحدي
بعد فتره المستشفى طلعت 40 شخص وكالوا للدكتور "طلعنا الاشخاص الي انت دزيتهم"
بس الصدمه جانت ب رد الدكتور ، كللهم "بس اني مدزيت احد"
وهذا يثبتلكم مدى فشل الطب النفسي ،
بالنهايه وظيفة الطبيب النفسي انو يسمع للمريض مو بس يشخص ، لان اكبر جزء بالتشخيص هو الاستماع للمريض ، وخصوصاً لغة جسده ونبره صوته ونظراته اثناء ميحجي
وهاي كلها ماكو دكتور او دكتوره نفسيين ب بغداد ينتبهون عليها واتمنى اكون غلطانه وتنطوني اسم واحد عالاقل يكون عكس الي داكوله .
رح انطيكم مثال صغير ، اليوم انت رحت للسينما وشفت فلم ، ثاني يوم خابرت صديقك وكتله شفت فلان فلم ، ف صديقك اتحمس وكلك احجيلي عن الفلم ف انت هل راح تكعد تحجيله كل حركه صغيره وكبيره صارت بالفلم؟ حتى لمن البطل يرمش تذكرله هاي التفصيله؟
لو رح تكله فد سمري بسيط تختصرله فلم ابو الساعه ونص ب خمس دقايق ؟
رح اخليك انت تجاوب هههههههههههههههه
بالحاله الطبيعيه الانسان راح يكول الاختصار ابو الخمس دقايق وراح يذكر بس التفاصيل المهمه والحبكه مال فلم الي الها علاقه وتأثر تأثير قوي على احداث الفلم ونهايته
نفس الشي الطبيب النفسي ، انت راح تحجيله الهوسه الي صايره بعقلك وهو راح ياخذ المهم منها ويشمر المو مهم ويسويلك خطة علاجيه سلوكياً وليس دوائياً وطبعاً يعتمد على حالتك ، ف الطبيب النفسي هاي حرفياً موهبته وقدرته انو يختصر المشاكل ويسوي منها سمري مفيد كلش ويطلعك الصافي
هل اكو طبيب ببغداد هيج مسوي؟ اني مشايفه هيج واتمنى تكلولي اكو
زين تيما يعني ليش علاج سلوكي ليش مو دوائي؟
لان نفس ما كلت فوك انو الامراض النفسيه هي شيء غير ملموس وغير مادي ف انت اليوم عندك فد فايروس مسببه مرض ، حتجيب الفيروس حتسوي ال anti مالته ويصير دوه ويصير حل ل مشكله
الادويه مال الامراض النفسيه شلون يسووها؟
بحسب ابحاثي ف اصلاً الامراض النفسيه ب بداياتها ما جانت تعالج بالادويه ، الدكاتره جانوا يشوفون انو الامراض النفسيه هي تنتقل عن طريق عدوى هههههههههه ف يعالجوها بالنزف حتى عود تخرج عن طريق الدم حتى ديعادلون السوائل بالجسم
بعدين صار الموضوع عمليات جراحيه ، كاموا يلوصون بالعبث يشيلون جزء من الطحال لو شوف منين هل يجي ب ايده
بعدين لا والله كلك المشكله بالدماغ ف احنا لازم نسوي عمليه بالدماغ وطبعاً اكيد تعرفون الاجراء الي جانوا يسوه الي اسمه lobotomy الي هو حرفياً يجيب بسمار ويدكه بالكصه ويحركها يمنه ويسره ويفرها شلون البريمه حتى يفك بين الفص الايمن والايسر ف هذا جان علاج للصرع تقريباً لان ماكو اتصال اصلاً بين الفص الايمن والايسر ههههههههههههه
وهسه وصلنا لاخر مرحله بالعلاج النفسي الي هي معادلة كيمياء الدماغ الي نوعاً ما هي مستمره لحد هذا اليوم ، وكل يوم تبين ليش هي فاشله اكثر من الي قبله ( فادت بعض من الناس بس هي مو حل ل مشكله لان مدتفيد الكل ف منكدر نعتمدها كلياً وننطيها لاي مريض بس لان عنده اعراض هذا المرض لان الامراض النفسيه بيها نسب )
وطبعاً جان اكو حركه ونهضه قويه ضد طريقة تشخيص المرضى النفسيين وطريقة علاجهم ( ضد الطب النفسي نوعاً ما )
وابرز الظاهرين بهاي الحركه هو توماس ساز
وجان عنده كتاب كلش راقي اسمه the myth of mental illness
وهو جان ديشرح ليش الامراض النفسيه ميكولون عليها disease
ويكولون عليها disorder ، لان بكل بساطه الامراض النفسيه غير ماديه نفس ما وضحت فوك
لان النفس مو عضو ، نفس الكبد والمعده والرئه ، ف شلون تكون مريضه؟
الي لاحظته شخصياً بكتابه انو عنده تناقضات والتباسات نوعاً ما بس اكو كذا جمله عجبتني كلش
“How can you medicate something that is physically not there?”
ورجع وضح انو انت اذا طريقة تشخيصك للمرض غلط ف اكيد طريقة علاجك اله غلط ، وكال
“ Instead of medicating them , be with them”
يعني شنو هاي الجمله وليش كالها؟ وممكن بعضكم يتعارض وياها ..
بكل بساطه انت كل الافكار الموجوده براسك شكد ما جانت عظيمه وراقيه ف هي لازم انو تنسمع وتطلع من راسك وتصير بالواقع لان مجرد ما تحجيها رح تطورها وتفك فد شفره بيها ، لازم تتعرض للنقد وللاحباط وللاستماع والتشجيع وتعيش كل المشاعر حتى بعدين توصل لمرحله متحتاج اي شي من هاي المشاعر بس يرادلك شغل كومه و وعي ومعرفه كلش هوايه حتى توصل لمرحله انو متتقبل النقد الا من شخص اعلى منك علمياً .
واحب اختم هذا البوست ب خلاصه بسيطه
المرض النفسي حقيقه لا يمكن انكارها
بس الصعوبه تكمن ب طريقة تشخيص المرض وطريقة علاجه