حكايتي مع ديكاتلون و شركة التوصيل اللي ضيعت الكولي و بغات تمسح الموس في ديكاتلون
جيت اليوم نحكي لكم حكايتي مع Decathlon و شركة التوصيل غير معروفة، و أنا اصلا ما نعرفهاش كون مشي ديكاتلون يتعاملوا معاها.
يوم 11 جويلية 2026 دخلت للسيت تاع ديكاتلون، و كمونديت 3 صوالح بمجموع 83.000 دج و خلصتهم بالبطاقة الذهبية ثم ثم، المهم لحقتني العفسة الأولى 13 جويلية، و لحقتني العفسة الثانية يوم 14 جويلية هذو زوج جاوني من المحل تاع آلجي، العفسة الثالثة من المفروض تلحقني 16 جويلية جاية من المحل تاع قسنطينة، جا داك النهار و انا قاعد نستنى و نتعقب في الكولي في السيت تاع شركة التوصيل و دايرين باللي استلمو الكولي بصح ما دايرينيش باللي مدوه للليفرور، و بداو يفوتو ليامات و ماكان والو، بديت نتقلق أنا و نبعث في الايميلات و نكوطاكتي في ديكاتلون و فيهم و كل مرة يجيبولي حكاية، و م بعد بعثت Mise en demeure لديكاتلون، جوابهم على الايمايلات تاوعي ماولاش يقنعني، غير رانا en contact avec la socièté de livraison afin de résourdre cette situation و خدمة الزبائن تاع شركة التوصيل مين كثرت عليهم في الواتساب المرة الاولى كذبوا عليا قالوا الكولي تاعك راح غلطة لتيزي وزو (عنوان التوصيل تاعي في الغرب) و م بعد ماولاوش يردوا و راحوا بلعاني داروا في السيت باللي رجعوا الكولي لديكاتلون يوم 4 أوت، خاطرش ما عندهم كيفاش يكذبوا و يقولوا استلمته منهم، مين شفت كيما هكذا تكلمت مع المحل تاع ديكاتلون تاع قسنطينة بالتلفون و قالوا لي الكولي ما رجعوهش لنا وهوما تاني فاقوا باللعبة تاع شركة التوصيل، قالي هو قاعد عنهم in transit من 13 جويلية و مين كثرنا عليهم الحس داروا رواحهم بلعاني باللي رجعوه 4 أوت، و على حساب ما فهمت من هدرته باللي الحكاية هي أن الليفرور سرقه ولا ضيعوه، ايا قالي غادي نرونمبورسوا لك دراهمك، و م بعد حنا نشوفوا وش نديروا مع شركة التوصيل.
والله نتمنى يفسخوا معاهم العقد على خيانتهم الامانة و زيد التزوير من الفوق.