u/agsarhan

في حالة نفسية منتشرة بكثرة بإيران والبلدان العربية وهي البحث عن ملاذ نفسي امن بامبراطوريات قديمة كرد فعل على الظروف السيئة اللي عايشين فيها ولحتى يلاقوا شي يحملوه ذنب انحطاط بلادهم.

بتلاقي الايراني عم يبحث عن هويتو الزرادشتية ينتمي الها والعراقي بابل والسوري ارام والمصري الفراعنة .

هاد كلو هو رد فعل نفسي عاطفي لتبسيط ظروف كتير معقدة متل فشل الأنظمة السياسية وفشل منظومة التعليم والفساد والخرائط الاستعمارية.

فالحل الاسرع والاسهل بدل الخوض بكل هالتعقيدات هو لوم الهوية الحالية والرجوع لتمجيد امبراطوريات قديمة جدا مع البحث عن "آخر" ليكون أقل شأن وأدنى مرتبة لتحميلو اللوم على الوضع المزري.

بهي الظاهرة النفسية بيتم الحديث عن انو كيف هاد ال"آخر" خرب فانتازيا العظمة اللي كانوا عايشينها وحرف هي الشعوب عن امجادها وعظمتها وشوهها والحل لكل هالمشاكل هو معاداة هي الهوية "الدخيلة" والتخلص منها واستعادة هوية قديمة منقرضة وهيك بتستعيد مجدك وبتصلح حالك.

كمان في نوع تاني من رد الفعل النفسي على فشل بلادنا وهو "هاد بسبب ابتعادنا عن الدين" بالنهاية الشخصين عم يخلقوا سبب مبسط جدا لمشاكل معقدة.

الحل بيبدأ من فهم الواقع وتعقيدو وظروفو وأسبابو مو من اسقاط انفسنا على أساطير ماضي فانتازي مثالي نعلق عليه كل احلامنا.

لوم الهوية بيعطينا تفسير سهل وعدو واضح متل ثقافة معينة نحملو اللوم على مشاكلنا بدل ما نحل مشاكلنا ونفهمها.

الفانتازية القومية ما بتصلح حالنا.

كيف برأيك رح تنتهي قضية السويداء؟

في كذا نظرية منتشرة رح اكتبهن وأكتب ليش ما ممكن تحقيقهم.

1- الانفصال: مستحيل لسببين. الأول اسرائيل مارح تقبل فيه عكس ما كتير ناس مفكرين انو اسرائيل بتحبو. الانفصال بيعني تشكيل دولة درزية ورح يولد رغبة استقلال عند دروز اسرائيل رح يصيروا يرغبوا بدولة درزية ويخف ولاؤهم لإسرائيل.

والسبب الثاني مقومات الدولة غير موجودة بالسويداء. مافي اي شي ممكن توقف عليه الدولة لا هي سياحية ولا صناعية ولا تجارية ولا زراعية ولا منافذ برية او بحرية.

2- الانضمام لإسرائيل: مستحيل كمان لسببين، الأول في درعا بالنص. الإنضام لإسرائيل يعني احتلال درعا + تهجير سكانها.

وهاد شي ما ممكن تعملو اسرائيل رغم انو عندها القدرة العسكرية بس المجتمع الدولي اولريدي واصلة معو للسما من اسرائيل.

الثاني انو فرضا اسرائيل ما فارق معها واحتلت درعا وهجرت مليون شخص لحتى تضم درعا والسويداء الها. رح تضيف مليون عربي "الدروز" لسكانها. يعني تهديد ديمغرافي للاغلبية اليهودية وهو شي ما ممكن تعملو اسرائيل. مستحيل تجيب مليون شخص غير يهودي.

3- استمرار الوضع الحالي: كمان مستحيل لانعدام اي دعم او استقرار داخلي. مافي اي نوع من انواع الحكومة. مجرد حكم عصابات كل يوم والثاني داقين ببعض ومقودين بعض ولا حتى في ادارة ذاتية. رغم الانفصال السياسي بس الاشياء الادارية لسا من دمشق سواء خدمات كهرباء واتصالات وغذاء وتعليم.

4- حل الاستعصاء السياسي: هاد الخيار الوحيد برأيي سواء عجبو للهجري او ما عجبو. شد ضهرو بقسد وماضل قسد. شد ضهرو بإسرائيل وموفق طريف كل يوم والثاني عم يصرح انو السويداء لسوريا نحنا ما دخلنا. دروز لبنان ضدو كمان. كل يوم عم تفلت المحافظة من ايدو اكثر والناس عم يديق خلقها منو اكثر. وأي حدا بيفتح تمو عم يقمعو فورا.

المسألة مسألة وقت فقط لحتى يبطل مسخرة باشان تبعو وما يضل عندو خيارات غير يسلم انو السويداء محافظة سورية تحت ادارة دمشق. ممكن يكون فيها نوع من انواع الادارة الذاتية للشرطة والأمن بس ما اكثر من هيك. طبعا في قضية ضباط الأسد وشبيحة اللي حاويهم عندو كمان لازم تنحل.

https://preview.redd.it/rn8gaignrvjh1.png?width=1600&format=png&auto=webp&s=c25565d8cf98b1eb9e8f3cd98ed1c648c501b279

مبدأيا الله يرحم الشهيد محمد غميرة اللي استشهد بسبب تعذيب شبيحة مخفر الحفة من الأمن العام.

بدي احكي عن ظاهرة اكيد كلنا ملاحظينها وحتى المقصودين فيها ملاحظينها ورح يكونوا عم يقرؤوا المنشور. هي ظاهرة البعض من السوريين اللي كانوا معادين الثورة وكل مبادئها ورافضين فكرة الثورة على القمع والظلم والاضطهاد وماخدين صف الأسد وجيشو وانظمتو الأمنية.

عايشين مبسوطين بكمية التعذيب اللي عم يرتكبها ضد السوريين ويقولوا عن الخوذ البيضاء ارهابيين ويضحكوا على قصفهم ويقولوا عن المتظاهرين مندسين ويضحكوا على اعتقالهم وضربهم ويقولوا عالجيش الحر ارهابي ويضحكوا على قصف المدنيين بمناطقو.

هاد النوع من الأشخاص وأي حدا كان بيفضل بقاء النظام على انتصار الثورة، اليوم صوتهم اعلى شي على اي جريمة من هاد النوع وهنن الاكثر نشاطا، سبقوا فريد المذهان وفضل عبد الغني.

طيب ليش هيك فجأة صاروا بشر وانسانيين رغم انو هيك جرائم كانت تصير بشكل يومي لعشرات الناس على ايدين النظام ومع ذلك كانوا يتمنوا عدم سقوطو ويحتفلوا بجيشو حماة الديار؟

ببساطة مو لأنهم بشر ولا لأنهم بيهتموا بحقوق الانسان ولا لأنهم بيهمهم سوريا وشعبها، بس لأنو عندو معركة بدو يخوضها من لما سقط النظام، معركتو ضد الثورة اللي اسقطت النظام ليقول انها فشلت و انو ما تغير شي. فهيك قضايا بالنسبة الو هي اسلحة ضد الثورة مو لأنو انساني او بيهمو حقوق الانسان والسوريين.

لذلك أي حدا كان بصف النظام بأي شكل كان مو شرط حامل صورة بشار وعم يدبك، أي حدا كان ضد سقوطو وأي حدا كان بيحب جيشو وأي حدا كان بيدعم بقاؤو لأي سبب كان. بحب قلك انو ما عم تضحك عحدا وكلنا منعرفك مصاص دماء ما بيهمك كم حدا بيموت تحت التعذيب او كم انتهاك بيصير، المهم كيف بتقدر تستعملهم لتحارب عدوك الثورة. وما فينك تتنكر بين الناس اللي طول عمرها عم تحكي ضد القتل والظلم. كل يوم كان في 100 أنس وانت كنت ضد سقوط النظام.

توضيح لحتى ما حدا يفسر عمراقو

https://preview.redd.it/pjf1mlg1siih1.png?width=2048&format=png&auto=webp&s=d01e27038c76d5681c8647f6fd0485e8674530d0

حالت النيابة العامة شكوى "التهديد بالقتل" المقدمة من المواطنين عبد الحميد عساف وعبود دياب بحق رجل الأعمال السوري المقرب من النظام السابق محمد صابر حمشو إلى محكمة بداية الجزاء المعلوماتية في ريف دمشق
ومن المقرر وفقًا لمذكرة دعوة موجهة إلى محمد صابر حمشو، أن يمثل المذكور اليوم، الاثنين 10 من آب، أمام قاضي محكمة بداية الجزاء المعلوماتية، في القصر العدلي بريف دمشق.
وقال عساف لعنب بلدي، إن مضمون الشكوى المقدمة من قبله وقبل عدد من الناشطين هو "التهديد بالقتل عبر صفحات وسائل التواصل الاجتماعي".
ويأتي هذا التحرك بعدما كان محمد حمشو قد رفع دعوى في أيار 2025، ضد عبد الحميد عساف بتهمة "القدح والذم الإلكتروني" عقب نشره ومجموعة من الناشطين مقاطع مصورة تدعو لمحاسبة حمشو والتحقيق في ثروته، وسرقات الحديد من المناطق التي دمرها النظام السابق