u/attess

السلام عليكم ورحمة الله وبركاته،
عيد الاضحى بيينا بعد كم يوم، ولا تنسون ان ما يعظم شعائر الله فانها من تقوى القلوب. تفضلوا بعض الفعاليات اليي سويتها في مناسبات منها العيد وغير العيد ونالت اعجاب البقية وسوت جو، هذا المنشور مخصص للناس اللي يقولون انه العيد عند اهلهم ملل فتفضلوا بعض الفعاليات عشان يصير غير ملل:

- اجمل لبس، البنات يسوون عرض ازياء سريع، وتسوون تصويت على اجمل لبس. بس المنظمة لازم تحرص انه محد يعرف كم صوت حصل لانه ممكن يصير زعل، ممكن تفوزون اكثر من وحدة والهدايا انا سويتها سوالف عناية بسيطة وكوب. الجائزة نا كانت مهمة كثر فرحة الفايزات انهم كانوا اجمل لبس، وحدة تقول لي لليوم كل ما تضايقت اتذكر اني فزت واستانس

- لونوا على المزهرية، يبت لكل بنت مزهرية زجاج وييبنا الوان ولوننا، احرصوا على توفير مراييل عشان محد يوصخ لبسه او البسوا بجامة

- مسابقة family trivia، انا رحت عند اليدة وسألتها وايد اسئلة عشوائية عن حياتها (اكلتها المفضلة، لونها المفضل، على منو سموها) بصراحة وايد استانسوا عليها الجميع لانه الاسئلة كانت وايد خارجة عن المألوف

- وحدة من اهلي كل فترة تييب لعبة وتلعب الكل وبصراحة الكل يستانس

والخلاصة اذا عيدكم ملل حاولوا انتوا تكونون سبب التغيير وسبب وجود عيد سعيد🩷
اسعدكم الله ومن تحبون

السلام عليكم ورحمة الله وبركاته، مثل ما كلنا عارفين بعد عيد الاضحى السعيد بندخل بشهر 6، وهو الشهر اللي بتجوفون فيه عدد محترم من عروض الوظايف في هذا المجتمع الجميل.

اعزائي بطلب تعاونكم في عدم التعاون مع اي عرض وظيفي نحس الهدف منه فقط التوطين، كيف نعرف هذه العروض الوظيفية؟ من الراتب والمسؤوليات الوظيفية والمسمى، ونلاحظ اغلبيتها موجهة لحديثي التخرج مو حبًا بهم بل عشان يستبخصون بالراتب اكثر واكثر. للتذكير انتوا تخرجتوا من جامعات في افضل الدول وعندكم افضل المهارات انه تداومون في وظيفة براتب اعلى، اتمنى انه محد منكم يلجئ لهذه الوظائف الا اذا وصل الحل الاخير او بسبب ظروفه وهو وقتها غير ملام. حاولوا تشدون حيلكم وتبحثون عن فرص برواتب مناسبة تعطيكم خبرة محترمة في مجالكم وتأهلكم كنقطة بداية لمسار وظيفي موفق بإذن الله. وفي النهاية نحن في هذه الدولة عشان نعمرها لانها بلادنا مو عشان نرضى باسوء راتب واقحط وظيفة ونقول يلا نافس يكمل، لا اخواني وخواتي لازم نروح لوظايف وننافس المدراء الاجانب وناخذ مكانهم لانها بلادنا ونحن اهلها اولى من يدير شركاتها بخبرات مناسبة اولًا واخرًا.

لا تنسون تدعون في عرفة بالوظيفة الممتازة، اتوقع دعوات الوالدة ويوم عرفة هو سبب توفيقي في دوامي بصراحة، الله يوفقكم وييسر امركم.

الإمارات للإفتاء تعلن ثبوت رؤية هلال ذي الحجة والأربعاء الموافق ل27 مايو هو أول أيام عيد الفطر المبارك. المصدر في التعليقات.

منو يعرف على ويكيبيديا يفيدنا، حاطين الشيخ محمد بن زايد الله يحفظه عنده 67 ولد، المشكلة مو بالغلطة هاي كثر انه جيكت وطلع ما في مصادر فما اعرف من وين طلعت هالمعلومة اصلًا.

بحط صورة في التعليقات حق اللي يبا يجوف وين كاتبين هالشي.