السلام عليكم ورحمة الله وبركاته

مسهم بالخير

قريت الكهف ولا باقي؟

تقييمي طويل لاني بحاول اذكر كل التفاصيل والتجربة ولاني احب اسولف لكن المختصر بقيم سماعة جدا رخيصة من شركة مو معروفة من متجر شي ان فإذا بس تبي تشوف التقييم وماتبي تضيع وقتك تلقاه بالنص الاخير.

تقييمي لسماعات... مدري وش اسم السماعة لكن مكتوب على الجوانب FOCWNGS؟ مدري اسم الشركة ولا السماعة ولا الصيني اللي مسويها المهم خلونا نسميها ونقز 🍗👀

اذا تدور سماعة للعب والمتابعة بس مطفر تطفير الارض وغالبا على المدى الطويل فهذي السماعات تستاهل تستثمر فيها

اتكلم عن سماعة ب٦٥ ريال (حاليا) لاني وقتها اذكر كانت عليها تخفيض واخذتها تحت ٣٠ ريال من شي ان، بكل الحالات تستحق للشخص اللي بنفس الوضع اللي ذكرته

جلست معي ٣ سنين تقريبا (اقل او اكثر) وبتكلم بصفتي مستهلك مايدل وين الله حاطه بسوق السماعات ومواصفاتها خصوصا في ذاك الوقت جربت كذا وحده رخيصة وواجهت مشاكل

من السعر لا تتوقع مواصفات عالية اكيد لكن كصوت ممتازة بالالعاب واذا بجيب مقارنة عشان تكون بالصورة بقارن بسماعات جربتها من نفس السعر وبسماعات قبلها من كورساير (قريب شكلها من الصورة جدا لكن مو نفس الموديل)

حقت كورساير ماطولت معي وخربت تقريبا حول ال٦ شهور (حسافة ال٣٦٥ ريال فيها) ومافيها شي مميز يعني صوت سماعات ونقز نفسه ماحس فيه فرق ابد!

سماعات ونقز اذا بتقارنها مع خوياتها جربت ٢ بنفس السعر فيهن مشاكل بالسلك وبالصوت واصلا بتسمع صوت كهرب بيجننك لما تكون هادي وانت تلعب وتبي تسمع خطوات ماتدري اللي تسمعه خطوات ولا فيه شرارة كهرب ضربت، بينما ونقز صوت واضح ونظيف

نجي للمايك لما شريتها وجربت الصوت توقعت ان الضحية للسعر هو المايك.. بس لا صدمتني وانا اسولف مع اخوياي بالديسكورد ان جودته عالية شكيت وسويت كليب اسمع صوتي وفعلا واضح! اهم مواصفتين بالسماعة جودتهم عالية جدا على سعرهم لكن فيه شي بالمايك جودته اقل (تكه) اذا كنت تتكلم بغير الديسكورد (يعني بشكل عام برنامج او لعبة ماتدعم الغاء الضوضاء) المايك يلقط اصوات الكيبورد وتكون مزعجه للي يسمع فالمدى اللي يلقط فيه اكبر شوي وايضا اذا فيه اصوات ناس عالية جدا خارج غرفتك احتمال يلقطها بعض الاحيان فاحسب حساب الشي هذا

بس؟ معقولة وش هالسماعة اللي سعرها رخيص! وصوتها ممتاز! ومايكها واضح! يعني هذي سلبيتها انها تلقط اصوات عالية جدا؟ يمكن كل المايكات فيها نفس المشكلة اصلا عادي

لا بنجي للسلبيات لكن احقاقا للحق سلبياتها تنهضم عشان السعر وبذكرها

اول شي اذاني وراسي متوسطة الحجم الى صغيرة تقريبا وبعلمك ليش ذكرت احجام هالنقطتين

الوسادات ماواجهت فيها مشكلة انها تحتويها لكن مشكلة تصميم السماعة انه لما تلبسها بتبقى اذنك من فوق لاصقة بالوسادة بينما من تحت مفتوحة شوي لانها التوت، ففيه مشكلة بسيطة بالتصميم وماثرت علي كثير وانا استخدمها (اتمنى وضحت المشكلة ومانفهمت غلط) وذكرت حجم الراس عشان تاضح لك اذا راسك اصغر من راسي بعد يمكن تكون مشكلة اكبر بالنسبة لك مع انه عندي اخوي الصغير شاري نفسها بالضبط ومبسوط فيها ماشتكى

على الطاري ٢ من اخواني عندهم بسألهم عن السماعة بشكل عام وارد لكم بالتعليقات عن تجربتهم

طيب بالنسبة للوسادات للاذن مريحة وبدأت تتشقق الطبقة الخارجية بشكل كبير لكن الى يومك تنلبس بدون ازعاج لكن الوسادة العلوية اللي فوق الراس مع اللعب قول ساعة متواصلة تبدأ تحس بالم للاسف ذيك القطعة مو مريحة مع الوقت

السلك واجهت فيه مشكلة بسيطة وماثرت علي كثير الصراحة انه من جهة البي سي اذا تحرك حيل تجي مشاكل بالصوت وانا خليته ثابت وماواجهت مشاكل وعادي اشبكه وافصله اكثر من مره لكن تنبيه لاستخدامك لا تلويها كثير وهنا فيه شي ابدع فيه اللي سوا السلك، السلك نفسه قوية مايلتوي بسهولة لكنه يبقى بشكله الثابت فالافضل انك لما تستعمل السماعة ماتلوي السلك كثير الاسلاك اللي داخل (النحاس وطقتها) واضح انها حساسة بزيادة لكن اللي يغطيها (زي الربر مع القماش مدري كيف جاي) شغال زي الحامي، وترا السلك النوع اللي جايك زي الربر والقماش من السماعة الى اسلاك الموزعه ذيك حقت المايك والصوت لكن سلك المايك والصوت نفسه ربر عادي زي سلك الشواحن حق البقالات فيه احتمال تكون المشكلة منهم اصلا وحلو انها مفصولة عشان لو هي اللي خربانة تبدلها لحالها ماتضطر تشتري سماعة جديدة

السماعة مافيها ازرار فيه فقط بكرة للتحكم بالصوت والمايك تقدر تفصله وتشبكه (ماستعمل ميوت بالديس دايم افضلها فيمكن يعطيك فكرة عن جودة المايك)

المواد اللي حول الوسادة من برا اسطورية الصدق جربت اطقها باصبعي.. اوجعني اصبعي هذا اللي اقدر اقوله🥲

التقييم كنت ناوي ابنيه على السماعات اللي بنفس السعر لكن فيه مقارنة استثناء راح تكون السماعة اللي من كورساير

اعطيها ٩ من ١٠ ادري تقييم عالي لكن بوضح سعر رخيص جدا مقابل تحمل واداء اسطوري للي بنفس الفئات (فئة الحكاكة تحديدا) اشوفها تستحق يعني لا زلت استعملها وجربت سماعة هايبر اكس كلاود (السلكية) عند واحد ايه افضل اكيد من ونقز ومو نفس الفئة لكن طول الثلاث سنين تقريبا ماشفت اني احتاج اغيرها لا زالت تؤدي الغرض وشغالة زي العسل👌